Un duelo entre galegas, é sempre un partido no que a rivalidade, ben entendida, saca o mellor de dada equipo. Así foi no cruce entre Poio Pescamar e Viaxes Amarelle FSF desta fin de semana. O trunfo foi para as locais 2-0 pero o espectáculo do cinco contra cinco reinou na Seca nesta 13ª xornada da Primeira División do FutSalFem español.
Na táboa as separan 16 puntos, e cinco postos. Mentres as verdibrancas do Poio Pescamar aspira ao título, as laranxas do Viaxes Amarelle previsiblemente loitarán por manter a categoría. Pero cando un duelo de rivalidade rexional está en xogo, as diferencias, redúcense.
Deste xeito, o Viaxes Amarelle FSF que adestra Jorge Basanta, afrontaba o segundo derbi galego deste novo ano 2021, e facíao fronte a un Poio Pescamar FSF que volvía coas ganas de manterse na zona nobre da táboa. As conserveiras facían valer a súa maior eficacia en aproveitar as ocasións para quedar co tres puntos, tras imporse por un marcador de 2-0, cun gol en propia porta das herculinas e outro tanto asinado por Ana Rivera.
O partido empezaba con dous equipos centrados nunha defensa a media cancha, e tratar de xerar ocasións á contra para poder adiantarse no marcador. Empezaron igualados en ocasións, pero as locais empezaron a gozar de máis ocasións, desbaratadas por boas actuacións de Sandra.
Na medianía do primeiro período, as herculinas tratarían de buscar con máis ilusión a portaría contraria e gozaron de varias ocasións, aínda que sen gran fortuna na definición final. Pero nunha das ocasións máis claras do Viaxes Amarelle FSF, o conxunto conserveiro armábase nunha contra rápida e puña o 1-0 no marcador, tras un balón ao centro da área, que Anna Escribano non conseguía desviar fóra. Os últimos minutos, foron tensos para ambos os equipos, pero o marcador mantívose inalterable co parcial de 1-0.
Caridad, un muro baixo paus para o Amarelle
Logo do paso por vestiarios o Viaxes Amarelle FSF saltaba á cancha máis centrado no ataque e empezaba a xerar ocasións de perigo sobre a portaría do conxunto local. Con todo, as coruñesas non eran suficientemente contundente na finalización das súas xogadas. E cando se perdoa, xa se sabe… Termina por se pagar. As futbolistas que adestra Jorge Basanta pagárono cunha contra froito dun roubo de balón de Ana Rivera na saída de balón herculina. A deportista puña cun disparo cruzado o 2-0 no electrónico, a falta de doce minutos para o final do encontro.
Pouco máis puido facer o conxunto coruñés que se deu de bruces cunha enorme actuación da cancerbeira local, Caridad García. Por algo ten o Poio as mellores porteiras da categoría nas súas filas.
As herculinas non baixaban os brazos, e seguían loitando por conseguir recortar distancias. Nos últimos catro minutos o Amarelle tirou de xogo de cinco, pero sen a suficiente fortuna para anotar gol.
O partido concluía coa vantaxe de 2-0 para a escuadra local que conseguía unha traballada vitoria ante un rival, teoricamente inferior, que non llo puxo doado na Seca.
Foi, sen dúbida, un partido moi competido e serio de ambos os dous conxuntos. O Poio Pescamar, cun banco moito máis amplo, e xogadas ensaiadas, puxeron en valor a súa calidade e experiencia na categoría para superar ás coruñesas.
Seguinte rival do Amarelle, o Cidade de As Burgas
No horizonte das de Basanta, un partido contra un contrincante que si é da súa Liga. Un rival directo como o Cidade de As Burgas, é o seu seguinte partido. O encontro xogarase no pavillón da Sagrada Familia da Coruña o sábado 13 de febreiro ás 17:00 horas.
Unha vez máis un duelo de rivalidade galega, pero esta vez entre dous equipos que loitan por manterse entre a elite do futsalfem estatal. Sétimas e oitavas. Antepenúltimas e penúltimas. Cun punto de diferencia entre si. Un partido que sen dúbida, terá as espadas en todo o alto.
O Poio Pescamar visita ao colista
No caso do Poio, o seu próximo reto deportivo semella doado. As galegas que adestra Manu Cossío poñen rumbo ás Ilas Canarias para visitar ao último clasificado: a AD Club Teldeportivo. As de Telde, adesradas por Cristina Gimeno, non coñecen aínda o que é gañar na máxima categoría. Unicamente colleitaron un punto froito dun empate 3-3 xustamente coas galegas do Cidade de As Burgas.
A seguinte xornada será moi diferente para as de Cossío que, presumiblemente, decidirán contra o todo poderoso Futsi Atlético Navalcarnero quen ostenta o liderato, xa que agora empatan a puntos (13) na cabeza da táboa.
FICHA TÉCNICA
POIO PESCAMAR FSF: Caridad, Miriam, Ana Rivera, Luci Gómez e Dani Sousa – quinteto inicial -. Tamén xogaron: Antía Pérez, Chiesa Agostina, Carol, Clara, Irene García, Iraia e Julia Dupuy.
VIAXES AMARELLE FSF: Sandra, Cris Lourés, Patri Corral, Yaiza e Candela – quinteto inicial -. Tamén xogaron: Anna Escribano, Lau Doce, Sofía e María Gómez.
GOLES: 1-0 Anna Escribano (propia puerta) (min. 16); 2-0 Ana Rivera (min. 28).
ÁRBITROS: Crespo Pardo e Ferrero Carballal do Colexio de Árbitros de Vigo. Mesa: Díez Gil do colexio de Árbitros de Pontevedra. Amonestaron a Miriam do Poio Pescamar FSF (cartón amarelo). E a Cris Lourés e Diego Rodríguez do Viaxes Amarelle FSF (cartón amarelo).
INCIDENCIAS: Partido correspondente á 13ª xornada do Subgrupo A da Primeira División Nacional Femenina de Fútbol Sala disputado no Pavillón Municipal da Seca en Poio.
