O Poio acumula a peor racha de toda a tempada tras as súas derrotas ante Burela, Alcorcón e a Penya. O sábado, ás 19:15 horas no pavillón da Estación en Navalcarnero dará comezo o que posiblemente sexa o partido máis complicado que queda en Liga para as conserveiras. O Futsi Atlético Navalcarnero é o único club da Primeira División que transforma todos os seus partidos en vitorias.
O vento sopra en contra, pero sempre hai que pensar en positivo. O refacho ten que cambiar e que mellor lugar que Pavillón Municipal da Estación para facelo, na casa do invicto líder. As galegas demostraron na primeira volta que poden poñer en apertos ás branquivermellas, que venceron por un axustado 1 – 2. De feito, ese foi o encontro no que menos goles anotaron en toda a tempada. Un fío de esperanza para as de Raúl Jménez.
O conxunto madrileño, lidera a táboa con 54 puntos, avantaxa en cinco ao Burela e quererá manter esa marxe de máis dun partido antes do parón para xogar os cuartos de final da Copa da Raíña, no que se medirán ao Alcorcón. A esta xornada chegan tras golear 0 – 10 ao Bilbo. Como locais marcaron 59 goles (53´64% do total) e recibiron 14 (53´85%) nos nove partidos que disputaron.
Pola banda galega, as tres derrotas consecutivas nos mesmos partidos de liga disputados este ano, afastan as de Jiménez do cuarto posto da táboa. Na memoria está a vitoria fai dous cursos na pista do Futsi por 2 – 3, reflexo ao que aspira un Poio en horas baixas. Na última visita ao feudo do Futsi, as rojillas caeron por 6 – 4, nun duelo no cal anotaron Iria Saeta e Dani Sousa.
A propósito de que será moi complicado traer puntos da capital, é unha obrigación mellorar sensacións e demostrar unha melloría para poder participar no playoff polo título, obxectivo marcado polo club galego para o final da tempada. Ademais, cambiar a dinámica é fundamental para recibir ao Roldán no torneo do KO con toda a confianza posible.
