O Poio Pescamar abrirá a xornada 21 de Primeira División, o sábado ás 16:15 horas, visitando ao UCAM Elpozo Murcia e conxunto galego tan só ten na cabeza manter as boas sensacións tras a vitoria da semana pasada ante o Univ. Alicante.
Dúas vitorias consecutivas, unha en Liga e outra en Copa, tres goles a favor e ningún en contra. Un posto gardado na Final Four da Copa da Raíña e o pasado finde púxose fin ao refacho de catro derrotas seguidas na competición doméstica. Parece que o novo estilo de xogo carbura e é hora de poñelo a proba lonxe da Seca. As galegas viaxan a terras murcianas coa mentalidade de traer os primeiros tres puntos como visitantes.
En fronte estará o undécimo clasificado con 25 puntos, 65 goles a favor e 69 en contra. O equipo dirixido por Juan Alcaraz pecha ese grupo de clubs que non teñen ningún perigo pola zona baixa e que están separados por poucos puntos en metade de táboa. A súa serie é idéntica ao conxunto galego en Liga, comezando o ano con catro derrotas seguidas e gañando a pasada fin de semana. No seu caso, fixérono por 1–5 na pista do Bilbo.
A última visita ao pavillón José María Cagigal foi na xornada que pechaba a campaña pasada, cun 2–6 ao favor das rojillas. Esta tempada, o partido da primeira volta saldouse co marcador de 8–1, con dobretes para Andrea Feijoo e Dani Sousa, así como un gol para Anna Escribano, Mirian, Inés Mayán e Irene.
Cabe destacar a capacidade goleadora do UCAM Elpozo Murcia, que cos seus 65 goles anotados é o cuarto conxunto máis goleador do campionato, só por detrás de Futsi, Burela e Alcorcón. Iso si, os números equilíbranse ao converterse no terceiro equipo máis goleado con 69 tantos recibidos. Só Bilbo e Xaloc encaixaron máis.
Todo apunta a un partido moi entretido e posiblemente con varios goles. No man das galegas está a posibilidade de seguir sumando e afastando rivais do quinto posto, ademais de manter a mínima esperanza de alcanzar o playoff polo título.
Un día menos para a recuperación de Clara
Un día menos para que Clara volva ás pistas. A xogadora do Poio foi operada con éxito da súa rotura de ligamento cruzado anterior no Hospital QuirónSalud Miguel Domínguez de Pontevedra. Agora tan só queda que a xogadora descanse e volva coas mellores garantías ao parqué.
Esta tarde Clara fue operada con éxito de su rotura del ligamento cruzado anterior en el hospital QuirónSalud Miguel Domínguez de Pontevedra 😄
Un día menos en la cuenta atrás para tu regreso @CYumpi ⏳💪🏼#PoioPescamar pic.twitter.com/UzJijqWuVQ
— Poio Pescamar FS (@PoioPescamarfs) February 18, 2020
