O Poio Pescamar converteuse no equipo con maior presenza no Mundial de Filipinas. O conxunto galego achegou sete xogadoras ao torneo, unha cifra récord nun campionato no que participaron dezaseis seleccións nacionais.
Por detrás, con seis xogadoras cada un, sitúanse clubs como o Benfica e o Nun’Álvares de Portugal, así como o Bardral Urayasu Las Bonitas de Xapón.
Que Galicia é un dos grandes referentes do fútbol sala a nivel estatal resulta irrebatible, pero o feito de que un club galego como o Poio Pescamar sexa o que achegou o maior número de xogadoras ao primeiro Mundial da historia dá unha idea das dimensións que, cada vez máis, está a acadar a nosa comunidade no panorama internacional.
Ale de Paz, Martita, Elena e Noelia Montoro, convocadas por España; Débora Lavrador e Carolina Pedreira, chamadas por Portugal; e Rafa Pato, seleccionada por Italia, foron as elixidas para competir nesta cita histórica.
Un novo hito das rojillas
Ter o maior número de representantes no Mundial de Filipinas non é o único récord do cadro poiense: tamén foi o equipo con máis xogadoras das súas filas chamadas a formar parte da Selección Española.
Ale de Paz, Noelia Montoro, Martita e a gardameta Elena González de Pablos son as catro xogadoras conxunto galego do Poio Pescamar integrantes do combinado nacional nesta cita mundialista.
Figuras do futsal luso, no Poio Pescamar
A lisboeta Débora Lavrador, habitual na Selección Portuguesa dende o seu debut en 2019, pasou polo Marín Futsal e polo Burela FS antes de lucir o dorsal 6 no Poio Pescamar. Tamén a ala Carolina Pedreira, natural de Cascais, e que se estreou con Portugal en 2022, formou parte destes dous históricos equipos galegos, aínda que actualmente viste o dorsal 13 no conxunto de A Seca.
Rafa Pato, convocada con Italia
Despois dunha ampla e exitosa traxectoria entre o fútbol e o fútbol sala, Rafaela Dal’Maz, coñecida futbolisitcamente como Rafa Pato representou a Italia no primeiro Mundial da historia. Aínda que naceu en Brasil, a pívot, que se estreou na liga española coa súa chegada ao Poio Pescamar, conta con dobre nacionalidade, brasileira e italiana.
