- No segundo derbi galego da 4ª xornada da máxima categoría do futsalfem estatal o Viaxes Amarelle FSF pelexou de ti a ti co Poio Pescamar FSF, pero rematou por caer derrotado na casa pola mínima (2-3)
O Poio Pescamar FSF aspira a loitar por todo nesta tempada, mentres que o Viaxes Amarelle FSF pretende asentarse nunha categoría na que xa estivo pero da que non quere volver marchar.
As herculinas conseguían irse ao descanso con dous goles de vantaxe, tras un en propia porta de Luci Gómez e outro de Clàudia Lobo. Pero na segunda metade o Poio Pescamar FSF conseguiu dar a volta ao marcador e poñer o partido ao seu favor cun 3-2. A pesar dos intentos locais por igualar a contenda, os puntos fóronse para Pontevedra neste derbi galego entre vermellas (desta volta de azul) e laranxas.
O partido empezaba con dous equipos exercendo unha presión alta de balón, e aínda que as visitantes tiñan máis posesión do balón. Ambos os dous conxuntos conseguían chegar con perigo, aínda que con poucas ocasións ás porterías contrarias para poder inaugurar os seus marcadores; pero o gol resistíase.
As locais do Viaxes Amarelle FSF estaban moi centradas en defensa cunha presión moi alta á saída de balón rival; e pouco despois da medianía do primeiro tempo, Carol Agulla manda un balón longo á área, que Luci Gómez trata de despexar coa cabeza, pero o balón acaba ao fondo da rede e pon o 1-0 para o Viaxes Amarelle FSF.
Aínda quedaba partido por diante, e as visitantes buscaban con máis apuro o gol, para igualar a contenda, pero o Viaxes Amarelle FSF non daba concesións ás podienses, que non conseguían o gol que lles metese no partido.
Xusto cando o partido parecía que se ía a ir ao tempo de asueto coa exigua vantaxe dun gol, chegaba unha xogada onde a escuadra laranxa non daba un balón por perdido e ao segundo rexeite, Clàudia Lobo poñía o 2-0 no electrónico da Sagrada Familia cando quedaban menos de trinta segundos para chegar ao descanso.
Logo do paso por vestiarios, o Poio Pescamar FSF iniciou cunha marcha máis e conseguía recortar distancias aos dous minutos cunha tremenda volea perfectamente executada por Dani Sousa, á saída dun córner (2-1).
Pouco máis duns segundos máis tarde Rocío poñía o 2-2 no marcador cun disparo cruzado desde a liña de área.
Luci Gómez dálle a volta ao partido para o Poio Pescamar
O Poio Pescamar FSF igualaba a contenda, e buscaba a vitoria, pero as herculinas empregáronse en defensa e traballaron para evitar o gol das visitantes; pero as ocasións seguíanse para o Poio Pescamar FSF, mentres que as herculinas, aínda que con menos, tamén tiñan algunha oportunidade de volver adiantarse.
Mediado o segundo período de xogo, Luci Gómez anotaba un auténtico golazo, por toda a escuadra da portaría local. O disparo da futbolista visitante, desde 10 metros, conseguía poñer por diante ao conxunto poiense (2-3).
O partido seguía aberto, e o Viaxes Amarelle FSF apuraba as súas opcións de conseguir a igualada e salvar un punto; e mesmo probaba co xogo de cinco nos últimos minuto. Pese a ter varias ocasións, o gol resistiuse e a vitoria levoulla o Poio Pescamar FSF.
Con todo, as coruñesas deron moi boas sensacións logo de loitar de ti a ti cun equipo que, este curso, debera pelexar por meterse nos play-off polo título.
Seguintes rivais de Amarelle e Poio
Tras este novo duelo oficial da tempada, o conxunto herculino retoma o luns os adestramentos, e faio coa vista posta na seguinte xornada da competición ligueira a próxima fin de semana. Chega a quinta xornada da Primeira RFEF Futsal Feminina, que terá lugar o sábado 8 de outubro de 2022, a partir das 20:00 horas no Pavillón Municipal da Granadilla (Majadahonda), onde o Viaxes Amarelle FSF visitará ao Rayo Majadahonda Afar 4 FSF.
Pola súa banda o Poio Pescamar xogará contra do LBTL Futsal Alcantarilla. As galegas son cuartas e as murcianas terceiras así que teñen as xogadoras do club vermello unha boa ocasión de irse colando nos primeiros postos da clasificación.
As poienses levan unha traxectoria nesta tempada na que venceron 7-1 na primeira xornada ao Joventut d’Elx FS, perdían 3-0 na cancha do Futsi Atlético Navalcarnero, e goleaba novamente na terceira xornada 4-0 ao FSF Móstoles. Esta vitoria pola mínima na cancha do Viaxes Amarelle FSF é, polo tanto, o seu primeiro triunfo a domicio nesta tempada e o primeiro no que pasa apuros para vencer (á marxe da derrota contra un intratable Futsi).
FICHA TÉCNICA
2) VIAXES AMARELLE FSF: Leti Rojo, Cris Lourés, Èlia Gullí, Lau Doce e Clàudia Lobo – quinteto inicial -. Tamén xogaron: Carol Agulla, Marta Hermo, María Gómez e Daryna Tkachenko.
3) POIO PESCAMAR FSF: Sandra Buzón, Rocío, Marta Peñalver, Martita e Laura Uña – quinteto inicial -. Tamén xogaron: Dupuy, Luci Gómez, Anna Escribano, Dani Sousa e Irene.
GOLES: 1-0 Luci Gómez (propia puerta) (min. 12); 2-0 Clàudia Lobo (min. 19); 2-1 Dani Sousa (min. 22); 2-2 Rocío Gómez (min. 23); 2-3 Luci Gómez (min. 32).
EQUIPO ARBITRAL: Lidia Crespo Pardo e Marcos Pérez Rodríguez do Comité Técnico de Árbitros de Vigo e Santiago de Compostela respectivamente. Árbitro asistente: Alberto Tóvar Rodríguez do Comité Técnico de Árbitros de Santiago de Compostela. Mesa: Santiago Modroño Liz do Comité Técnico de Árbitros da Coruña. Amonestaron con cartón amarelo á xogadora do Viaxes Amarelle FSF Cris Lourés, así como a futbolista do Poioi Pescamar Anna Escribano, tamén con cartón amarelo.
INCIDENCIAS: Partido correspondente á 4ª xornada da Primeira División da RFEF do Fútbol Sala Femenino disputado no pavillón Municipal da Sagrada Familia na Coruña. Derbi galego do futsalfem. Partido transmitido por Live Vuvuzela e a TVG2.
