Un dos clásicos do deporte “non hai enimigo pequeno”, o puido testar en carne propia o Poio Pescamar esta xornada na que gañou 5-2 ao Teldeportivo con non pouco sufrimento.
As galegas tiveron que se empregar a fondo para imporse a un teimudo e infatigable Teldeportivo que obrigou ás futbolistas do Poio Pescamar a porse o mono de traballo. A calidade e o esforzo insistente ante a meta rival foron os trucos do equipo conserveiro para poder levarse os tres puntos diante dun rival, en teoría, asequible.
Se cadra quen vexa o resultado final 5-2 para o Poio Pescamar pensa que non foi para tanto, que non pasaron apuros, pero si. O marcador non reflicte o cara que lle costou a vitoria ás galegas. As visitantes lograron empatar o partido até en dúas ocasións.
O primeiro gol foi local e chegaba aos seis minutos de partido obra de Antía Pérez a balón parado froito dun saque dende o curruncho botado en curto. A de Manuel Cossío optou por un tiro raso co que perforou a meta rival grancanaria anotando o 1-0.
Sorprendentemente o feito de adiantarse no marcador supuxo o inicio dos problemas para as locais que pasaron uns minutos de certa relaxación, mentres as canarias apretaban e puñan en perigo a Caridad. Cunha presión menos asfixiante das poienses, as grancanarias atoparon ocos e chegaron con maior claridade á meta rival. E xa se sabe… tanto vai o cántaro á fonte… O Teldeportivo anotaba o 1-1 cun tiro á escuadra de Idoya. Corría o minuto 13 de xogo.
Co empate chegaríase ao descanso e un minuto despois da reanudación, Judit Dámaso anotaba en propia porta tentando despexar o balón. Foi o 2-1 para as galegas.
As táboas volverno ao luminso cun disparo cruzado de Marina Benete que anotaba o segundo para as grancanarias (2-2). O Poio Pescamar volveuse poñer por diante cun gol de Irene García no minuto 28. A partir de aí as galegas seguirían ampliando a súa vantaxe sendo máis efectivas no remate, gañaron profundidade e con iso puxeron distancia no electrónico. 4-2 obra de Luci no 32 cun tiro ao segundo pau, e o definitvio 5-2 que asinaba sobre a bucina Miriam.
Intentouno tamén nos minutos finais o Gran Canaria Teldeportivo pero sen éxito. As xogadoras que adestra Cristina Gimeno dispuxeron de ocasións e amosaron un xogo digno da categoría.
Foi un partido moi disputado e de presión alta ao rival por parte de ambas as dúas escuadras. Un partido que lembra que non hai enimigo pequeno e que calquera pode dar a badalada nesta competición. Ao final do cruce, o Teldeportivo ocupa a penúltima posición e o Poio Pescamar persigue de preto ás líderes, o Futsi co que empata a puntos na cabeza. É dicir, segundo pola cola, e segundo pola cabeza da táboa ofreceron un partido moi disputado e no que ambas as dúas escuadras tiveron as súas ocasións.
Diferente obxectivo do rival
Na vindeira xornada o Teldeportivo recibe ao Cidade de As Burgas, nun partido crucial para ambos os dous conxuntos na loita pola salvación. E o Poio Pescamar visita ao Futsi At. Navalcarnero na loita polo primeiro posto. Dous partidos coas espadas en todo o alto, un para determinar quen queda como pecha cancelas, e o outro para saber quen queda líder.
FICHA TÉCNICA
POIO PESCAMAR: Caridad; Irene García, Ana Rivera, Luci e Dani Sousa – quinteto inicial -. Tamén xogaron: Antía Pérez, Dupuy, Mirian e Iraia.
TELDEPORTIVO: Mariona; Marta Gallego, Judit Dámaso, Idoya e Paulita – quinteto inicial -. Tamén xogaron: Marina Benete, Judit Collado, Vanessa Jiménez, Naira e Muni.
GOLES: 1-0, Antía Pérez (min. 6). 1-1, Idoya (min. 13). 2-1, Dámaso (propia porta) (min. 21). 2-2, Marina Benete (min. 25). 3-2, Irene García (min. 28). 4-2, Luci (min. 32). 5-2, Mirian (min. 40).
ÁRBITROS: Guntín Garrido e Otero Mira. mostraron cartón amarelo a Judit Collado, polo Teldeportivo, e a Antía Pérez, polo Poio Pescamar.
INCIDENCIAS: Partido correspondiente á quinta xornada do SubGrupo A da Primeira División do Fútbol Sala Feminino da RFEF. O cruce disputouse no Pavillón da Seca.
