O Plogging Tour chega á cidade da Coruña. Este domingo a cidadanía coruñesa poderá participar nesta iniciativa que xurde co obxectivo de combinar o exercicio físico coa recollida de lixo na contorna de Bens. A actividade, que pasou xa por outras cinco cidades españolas, desenvolverase na contorna de Bens.
O programa foi presentado por Esther Fontán, concelleira de Medio Ambiente da Coruña, nun acto no que sinalou a zona pola que transcorrerá o Plogging Tour, desde Edar de Bens e O Portiño, até a cala de Bens, ao mesmo tempo que destacou o aspecto de concienciación medioambiental desde a óptica da limpeza.
Fontán explicou que unha vez se recompilen os residuos e os separen en Bens, “darémonos conta do que somos capaces de tirar nos nosos bosques e xardíns”. Para a concelleira, a actividade será un bo final para a Semana do Medio Ambiente, na que “agardamos que se animen coruñesas e coruñeses de todas as idades”.
Como se desenvolverá o Plogging Tour?
A entrega dos dorsais comezará ás 09:00 horas en Bens e a propia carreira dará inicio ás 09:45 horas. As persoas participantes poderán desfrutar dun percorrido que vai desde a módica distancia de 1.2 km até os 8 km. O Plogging Tour terá lugar na Coruña como parte dos obxectivos que se marca o Goberno de Inés Rey para cumprir coas premisas da Axenda 2030.
A organizadora, Beatriz Soliva, sinalou que as cidades visitadas até o momento (Ibiza, Teruel, Madrid, Málaga e Mallorca) xuntaron preto de 9.200 kilos de lixo, e remarcou que o Plogging Tour supón unha aposta pola inclusión xa que está deseñada para todos os públicos e niveis, mais “adaptándose sempre á capacidade permitida e creando grupos burbulla”.
Desta forma, as categorías divídense por familias, participantes e deportistas. Baixo o lema de “Temos o poder de facer moito polo planeta”, o domingo tomarán a contorna de Bens, polo que as veciñas e veciños poderán realizar o circuíto, pero tamén desfrutarán dunha carpa de arte e reciclaxe, “en que faremos esculturas cos restos para lles dar unha vida propia, unha segunda oportunidade coa que impulsarmos a economía circular”.
Co patrocinio de Nationale Nederlanden, a coordinadora agradeceulle ao Concello todos os meses de traballo conxunto na busca da localización axeitada: “Foi difícil porque esta cidade está moi limpa, mais este espazo necesita acción e conciencia”. Así mesmo, destacou a colaboración da Policía Local e a Protección Civil, e dos distintos clubs e persoas voluntarias, “algo que está plasmado nas numerosas inscricións que recibimos” na súa web Plogging Tour A Coruña.
