- A Secretaría Xeral para o Deporte da Xunta de Galicia, a través da Fundación Deporte Galego, vén de publicar o anuncio da segunda fase do Plan de Patrocinio dos equipos de alta competición de Galicia da tempada 2023/2024.
Esta segunda fase contará cun orzamento de máis de 1,2 millóns de euros (1.251.140 euros) para convidar a 126 equipos que cumpren cos requisitos do Plan e que xa recibiron a notificación por parte da Fundación Deporte Galego.
Segundo informa a Xunta de Galicia nesta segunda fase do Plan de Patrocinio de equipos de alta competición constan 48 femininos, 67 masculinos e 11 mixtos, pertencentes a 12 modalidades e 18 especialidades deportivas diferentes.
Na primeira fase destes patrocinios da Xunta houbo 125 equipos beneficiados
Cómpre lembrar que a primeira fase do Plan contou cun orzamento de preto de 2,6 millóns de euros (2.596.660 eruos) e 125 equipos beneficiados (66 femininos, 56 masculinos e tres mixtos) de 13 modalidades e 17 especialidades deportivas diferentes, polo que a contía global do Plan de Patrocinio dos equipos de Alta Competición de Galicia acada preto de 3,8 millóns de euros, o que supón o maior orzamento rexistrado.
Explican desde a Secretaría Xeral para o Deporte que “dende a tempada 2021/2022 o plan adáptase ao calendario de competición dos equipos galegos con dúas fases, en troques de obedecer ao exercicio anual”.
“Grazas á consolidación deste plan e a implicación e compromiso das entidades patrocinadas que cumpren estritamente as esixencias publicitarias establecidas pola Fundación, para esta tempada 2023/2024, unha vez máis, todos os equipos obxecto deste patrocinio serán o escaparate perfecto para demostrar que o Deporte Galego é un soporte publicitario de gran valor para exportar polo mundo a imaxe do noso tecido empresarial galego”, explican desde a Xunta de Galicia.
O Plan de Patrocinio dos Equipos de Alta Competición da Xunta de Galicia pode ser consultado na páxina web do Deporte galego.
En total, desde o primeiro ano do Plan -2009/2010- os equipos de alta competición de Galicia recibiron máis de 40 millóns de euros, sumando a contía total do Plan 2023/2024. Cómpre destacar, ademais, que o Plan de Patrocinio Publicitario para Equipos Femininos encara a súa cuarta edición, unido estreitamente á Campaña NON contra a violencia de xénero.
