A Federación Galega de Balonmán, da man da Xunta de Galicia e a través do Plan Corresponsables, contrata a máis de sesenta monitores/as de balonmán para impulsar a igualdade e a conciliación familiar, así como profesionalizar o sector e fomentar a práctica do balonmán en toda a comunidade galega.
Este proxecto púxose en marcha no mes de xuño e, nestes intres, a Federación Galega de Balonmán, ten funcionando 58 monitores/as, 5 coordinadores/as, máis de 200 actividades e máis de 1.000 nenos e nenas achegándose á practica do balonmán.
O pasado 22 de xuño presentouse na Cidade da Cultura de Galicia o Plan Corresponsables, mediante o cal, a Federación Galega de Balonmán, en colaboración coa Secretaría Xeral Para o Deporte da Xunta de Galicia, e a Consellería de Fomento do Emprego e a Igualdade, contratou a máis de sesenta monitores/as. No acto de presentación estiveron presentes o vicepresidente da Xunta de Galicia, Diego Calvo; a conselleira de Emprego e Igualdade, Mª Jesús Lorenzana, e o presidente en funcións da Federación Galega de Balonmán, Bruno López.
Bruno López comentou: “este proxecto é algo que viñamos buscando dende o comezo do noso mandato, podemos dar solucións para a conciliación familiar, dar a posibilidade de que todos os nenos e nenas fagan deporte, sen excepcións; ao mesmo tempo podemos promocionar o balonmán e facer que os nosos monitores/as vexan una saída laboral. A Mariña Lucense, Lugo, Ourense, Santiago, etc… son zonas nas que estamos tratando de que o noso deporte teñan maior presenza gracias a este plan”.
Este proxecto nace coa intención de dar solucións á conciliación familiar, de achegar o deporte a todos os nenos e nenas de entre 4 e 16 anos, e de profesionalizar as estruturas dos clubs e das escolas deportivas.
O Plan Corresponsables esténdese a diferentes deportes e lugares de Galicia
Ao abeiro do Plan Corresponsables, segundo informaba a Secretaría Xeral para o Deporte, vanse desenvolver máis de 500 actividades en Galicia que non se limitan ao balonmán. Esta iniciativa chegará a preto de 150 concellos e permitirá a contratación de 250 persoas monitoras. O investimento da medida ascende a máis de 2,5 millóns de euros.
As accións deste impulso á conciliación executaranse a través dos distintos programas das federacións deportivas que contan cun proxecto que se engloba dentro do Plan Corresponsables, é o caso da Federación Galega de Balonmán, pero tamén doutras disciplinas deportivas como son baloncesto, bolos, boxeo, esgrima, fútbol, halterofilia e hoquei. Figuran tamén a loita, o montañismo, o piragüismo, o salvamento e socorrismo, o squash, o surf, o taekwondo, o tenis, o triatlon e péntatlon moderno e tamén a vela.
Actividades deportivas para máis de 8.000 menores de ata 16 anos no Plan Corresponsables
