O CB Arxil contará coa achega da pivote Samra Omerbasic (1.91cm e 30 anos) que vén completar a plantilla do seu equipo da Liga Feminina 2. Péchase así o capítulo da marcha de Ndoye, e o equipo pontevedrés que adestra Maite Méndez acada maior profundidade no seu bloque.
Nada en Saraievo, Samra acumula experiencia continental, en ligas como Francia, Polonia, España ou a República Checa. É internacional con Bosnia Herzegovina en todas as súas categorías.
Procede da Liga Feminina Endesa do Casademont Zaragoza. Alí xogou desde pasado verán e tivo protagonismo en 12 dos 21 encontros de disputados até esta data, cunha media de 4:33 segundos por encontro.
Historial deportivo de Samra Omerbasic
Samra Omerbasic, arrincou a súa traxectoria como deportista con dúas tempadas no ZKK Spars Saraievo e deu o salto ao Zeljeznicar Saraievo durante catro campañas, nas que xogou tamén a Eurocup.
Na tempada 2016-2017, vai xogar no Lle Havre, da máxima división francesa, marchándose a posteriori ao Goga Basket de Albania, selando 14 puntos 11 rebotes de media e sendo elixida a mellor pivote da competición.
Na tempada 2017-2018 Samra Omerbasic chega a España para militar na LF2 co CB Almería e deixar na súa tarxeta 10.4 puntos e 6.3 rebotes.
Unha tempada despois, na 2018-2019, militou no GE MKK Siedlce de Polonia onde asinou 8.3 puntos 3.5 rebotes.
O pasado exercicio (2019-2020) xogou no Basket Slovanka MB Tabor (Czech Rep.-ZBL) onde deixou 7.3 puntos e 3.6 rebotes de media. Mediada a tempada ficha en Estonia e a pandemia curta a súa andaina neste equipo.
Lino Vázquez: “Volvemos conseguir un potente xogo interior”
Sobre a achega que Samra Omerbasic poderá traer ao CB Arxil, o técnico, Lino Vázquez, apunta: “Con Samra completamos o plantel e, xunto con Foorster, Cristina Díaz Pache-Blas e Margarita Moreira volvemos conseguir un potente xogo interior verde”.
Sobre o seu perfil, o adestrador sinala que é “unha xogadora con experiencia en España, ten coñecemento do xogo e é complemento perfecto para o noso xogo interior. Esperamos que nos axude na anotación do equipo, rebotes e experiencia”.
Lino Vázquez agradecía “á directiva do Casademont e sobre todo a Pep Cargol as facilidades dadas para que Samra poida xogar en Pontevedra no Arxil e sobre todo a ela e ao seu representante que fixeron todo o posible para poder estar aquí esta semana”.
