Na súa visita á Coruña o Bembrive FS colleitaba unha derrota 6-3 logo de empezar por diante no marcador electrónico do Pavillón Municipal da Sagrada Familia. Roberto Carlos García ‘Pitu‘, o adestrador do conxunto vigués lamentaba ao final do encontro co Viaxes Amarelle FSF algúns dos erros cometidos durante o partido ao tempo que salientaba o nivel das contrincantes. Foi un partido entre dous dos equipos máis potentes da categoría, por algo están na zona alta da táboa na Segunda División Feminina do Fútbol Sala da RFEF.
En opinión de Roberto Carlos García Pitu o rival deste sábado, o Viaxes Amarelle FSF, é “sen dúbida, o mellor equipo da categoría. A intensidade que trae da división de honra… a nós cústanos chegar a ela. Plantexaramos un partido que nos primeiros dez minutos era o esperado, pero ao final os detalles son fundamentais e neses detalles non estivemos ben”, puntualiza o técnico das galegas.
Segundo explicaba Pitu, oo final do partido as olívicas xa estaban “moi cansas. As rotacións témolas moito máis xustas ca elas. Tivemos que optar polo xogo de cinco e conseguimos poñernos 5-3. Pero os erros, xogando de cinco, págalos”.
Aplicando a crítica construtiva e facendo unha análise do partido para aprender de cara a futuros partidos do Bembrive, Pitu declaraba: “É unha mágoa que xogando de cinco e defendendo so cometarmos unha falta na segunda parte”. “Son detalles. Se parásemos ao rival con algunha falta na metade da pista, seguramente poideramos ter acadado algunha opción máis”, lamentaba logo do partido contra as herculinas Roberto Carlos García Pitu, adestrador do Bembrive FS.
