O BAXI Ferrol inicia hoxe, venres 20 de agosto, o traballo de pretemporada. As xogadoras do conxunto do BAXI Ferrol arrancan cos adestramentos para preparar a nova tempada 2021-22, na que o conxunto ferrolán xogará na LF Endesa. Onte, xoves, todas as integrantes do equipo sometéronse a test para certificar de que están en condicións para poñerse ás ordes do técnico Lino López, que repite á fronte do banco departamental.
Nos primeiros días, farase un traballo intenso de ximnasio e unha sesión de pista, aínda que algúns días realizaranse dúas sesións na cancha, pero polo momento non están definidos os horarios, xa que desde o club informan que están pendentes “dunha reunión co concelleiro de deportes”.
Seis renovacións e cinco incorporacións
O BAXI Ferrol retorna á LF Endesa “con moita ilusión por formar un bo bloque e facer un bo papel na máxima categoría do baloncesto feminino español”, din desde o club. O equipo técnico estará conformado neste curso por Lino López, Sandra Prieto e Sergio Jaurena.
Para este reto, o cadro departamental contará con seis xogadoras do ano pasado, despois de renovar a Patri Cabrera, Natalia Rodríguez, Irene Garí, Suné Swart, Dynn Leaupepe e Jenna Allen, mentres que incorpora a cinco novas xogadoras coa chegada da francesa Zoe Wadoux, a serbia MIlica Ivanovic, a americana Taylor Koenen e a españolas Carmen Grande e Alicia Villegas.
Nesta semana chegaron a Ferrol Irene Garí e a francesa Zoe Wadoux, estando previsto que nos próximos días incorpórense o resto de xogadoras. Para as primeiras sesións de traballo, non estarán co equipo Jenna Allen, Dynn Leaupepe e Taylor Koenen, porque están á espera de conseguir o visado para poder desprazarse a España. Realizarán a pretemporada co primeiro equipo as xogadoras da canteira Sonia Bra, Carla Pena e Zaira González.
O primeiro partidos de preparación, coas campioas de Liga
Dentro da pretemporada, o cadro ferrolán do BAXI Ferrol ten programados unha serie de encontros para que o corpo técnico poida ir valorando a progresión do equipo.
O sábado 4 de setembro será o primeiro partido, co enfrontamento diante o actual campión de liga, o Perfumerías Avenida, no pavillón da Malata.
O mércores día 4, o pavillón da Gándara, en Narón, acollerá o duelo de rivalidade galega diante o Durán Maquinaria Ensino, nunha contenda entre os dous equipos galegos que neste curso 2021-21 van militar na máxima categoría do baloncesto feminino español.
O venres 17 de setembro, o equipo ferrolán desprazarase ata Marín para dirimir o enfrontamento de semifinais da Copa Galicia, diante un rival da fase previa desa competición. De gañar ese encontro, dous días máis tarde, no mesmo escenario, disputaría a final do torneo.
Campaña de abonadas/os do BAXI
Mentres tanto, o club mantén aberta a campaña de abonados, podendo darse de alta ata a próxima semana no Bar Sur, en cálea madalena 50. A partir do día 25 volverá poder facerse no pavillón da Malata.
O BAXI Ferrol xa superou as 800 persoas abonadas, pero espera que durante o mes de setembro nótese un repunte de abonados ata poder alcanzar as 1.300, que son os que confía en obter a entidade, para poder facer o proxecto sostible.
