Dominio laranxa de principio a fin

Vista Alegre foi testemuña esta tarde dun Pescados Rubén Burela FS que deu un paso adiante en verticalidade, aínda que tamén con certos erros nos últimos metros, ante o novel Xaloc, un rival moi entregado que apelou á intensidade en defensa para mitigar a ofensiva galega, con 4-0 final. Por diante, as guerreiras laranxas afrontarn unha semana de dobre compromiso a domicilio, coa ida de semifinais de Copa Galicia o martes na Coruña con Viaxes Amarelle FSF (12.00 horas) e a xornada 22 o sábado na pista de STV Roldán (12.00 horas).

 

1 de 3

- +

A gardamallas do Xaloc, Toñi tivo que aplicarse a fondo ante a avalancha das Guerreiras. Peque e Cilene foron as primeiras en merodear a meta alicantina. A pichichi burelista asediou sen tregua. Luci e Jenny tamén rozaron o pau. Por fin, no 9, as mariñás abriron a lata, con firma de Jenny Lores que quedou diante da portería baleira ante a saída de Toñi fronte a Dany, en banda contraria.

Antes do gol, Ángela tivera a primeira con perigo con excelente resposta de Jozi. Peque, no 12, selou o gol da xornada cunha maxistral vaselina pola banda, desde case media pista, e tras sortear a tentativa defensiva do Xaloc. A xoia da Fervenza, Cris Lourés, estreou a súa conta laranxa rematando na liña de meta a ocasión de Jenny Lores. O pau evitou o cuarto, nas zapatillas da 21 mariñá, a 18 segundos para o descanso.

Menos fortuna nos metros finais tiveron as de Julio Delgado e Lucas no segundo acto. Avisou Lara Balseiro, esperando ao segundo pau Cristina, no 24. Pero pouco se fixo esperar o 4-0. Preto do minuto 25, Peque volveu facer acto de presenza, a pase de Jenny Lores, coa rede libre. Lucía Paz, tan só dous despois, resolveu moi ben para manter a portería galega a cero, ante Miriam, practicamente na única das visitantes. Unha e outra vez, a ofensiva do Pescados Rubén bateu contra a meta do pechacancelas, cunha defensa que pelexou ata o último balón.

FICHA TÉCNICA

PESCADOS RUBÉN BURELA: Jozi, Cristina, Cilene, Peque, Lara Balseiro, cinco inicial; tamén xogaron Jenny, Jenny Lores, Dany, Luci, Cris Lourés, Lucía Paz.

XALOC: Toñi, Eva, More, Miriam, Ángela, cinco inicial; tamén xogaron Tere, Sáez, Lydia, Claudia, Elena.

GOLES: 1-0, minuto 9, Jenny Lores; 2-0, minuto 12, Peque; 3-0, minuto 18, Cris Lourés; 4-0, minuto 25, Peque.

ÁRBRITROS: Rodríguez Castro // Fernández Vega.

INCIDENCIAS: Partido correspondente á xornada 21 de Primeira División disputado en Vista Alegre antes uns 400 espectadores.