As galegas queren seguir sumando e metendo presión ao Futsi. Non hai dous sen tres e o Pescados Rubén Burela FS quere sumar a súa terceira vitoria consecutiva neste 2020. Para iso, visita mañá, na xornada 18 de Primeira División, a pista dun FS Majadahonda que buscará na casa o primeiro botín de 2020 para recuperar as boas sensacións coas que despediu o ano e tomar aire así coa zona de perigo. A cita de La Granadilla arrincará ás 20.00 horas.
As madrileñas reciben as Guerreiras na décimo terceira praza, con 14 puntos, e coas recentes derrotas ante Roldán (1-4) e Zaragoza (2-1). En fronte saltarán á pista as mariñás, tras o traballado triunfo ante Móstoles (4-3), na segunda posición (46 puntos).
“Despois dun partido moi difícil, esperamos un rival que non nos poñerá as cousas doadas. Majadahonda sempre planta cara na súa casa, ante calquera rival. É un grupo que se coñece moi ben, cun estilo de xogo marcado con xogadoras moi verticais” advertían Ale de Paz, autora dun dobrete a semana pasada e tamén no 5-0 precisamente da primeira volta ante as ‘majas’.
Ale de Paz, xogadora do Burela: “Despois dun partido moi difícil, esperamos un rival que non nos poñerá as cousas doadas. Majadahonda sempre planta cara na súa casa, ante calquera rival”.
“Non son unha xogadora goleadora, pero están saíndo ben as cousas e intentarei seguir coa racha” recoñecía a xogadora nedense, incidindo en recuperar a liña de partidos das burelistas, con resultados curtos: “O ideal sería volver a partidos que reflectían no marcador o noso acerto defensivo, con portería a cero ou poucos goles encaixados”.
Ale de Paz, xogadora do Burela: “Non son unha xogadora goleadora, pero están saíndo ben as cousas e intentarei seguir coa racha”.
Peque e Ana Romero, ausencias importantes
A expedición partirá mañá ás 9.30 horas coas ausencias de Peque, que xa non puido participar ante Móstoles por unha escordadura leve de nocello e contractura de xemelgo, nin Ana Romero, que sofre escordadura de ligamento lateral interno de xeonllo. Poderá estar dispoñible a porteira de Comarcal A Fervenza FSF, Lucía Paz.
