O Pescados Rubén Burela FS retomou hoxe a senda triunfal na visita do Sala Zaragoza (4-2) para reforzarse na segunda praza. Custoulles reaccionar ás laranxas, pero souberon reaccionar contra unha defensa pechada que xerou moito perigo á contra e se puxo por diante en dúas ocasións. Vista Alegre quentou motores para o Día Internacional da Muller e a manestación comarcal de mañá en Foz (12.00 horas) coa saída en fair play das pancartas Galega 8M e Sen Coidados Non Hai Vida.
Non empezaron ben as cousas para as burelistas e as mañas adiantáronse xa no minuto 3 cun gol de Livia tras superar a liña despois dunha pugna entre Rafinha e Jozi. Pediu tempo Julio Delgado e avisaron con moito perigo Cilene, de lonxe, e Peque, en rexeite.
A 7 laranxa volveu intentalo de volea no minuto cinco. Tres minutos despois, Dedeia a punto estivo de chegar ao segundo pau en contragolpe, e Cristina, no ecuador do primeiro acto, freou unha nova recuperación visitante. Peque non puido gañar a partida na área zaragozana fronte a Suzan no 14, pero si puido facelo Bea Mateos acto seguido para igualar a contenda.
Peque, pasado o cuarto de hora, rozou o pau, e Jenny, no 17, intentouno pola escuadra. Estábao merecendo o Pescados Rubén e tivo a oportunidade Jenny en dobre penalti, con gol anulado, a falta de minuto e medio para o descanso. Asediaron as mariñás, primeiro coa lusa e máis tarde con Ale de Paz aínda que sen éxito.
Tras o tempo de lecer, volveu o dominio mariñán ao parqué e intensificou o seu monólogo de ocasións pero as de Chus Muñoz conseguiron de novo a iniciativa á contra no 28, por medio de Rafinha. Luci puido recuperar o empate de disparo cruzado no 29 pero foi a maxia de Cilene quen aos poucos segundos puxo as táboas cun mísil ao segundo pau.
Tan só dous minutos despois, o Pescados Rubén tomou vantaxe con Bea Mateos nun lanzamento que tocou Suzan pero non puido frear o disparo. Con cinco e medio para o final, o Zaragoza saltou con porteira xogadora.
Xa chegando ao minutos finais, as burelistas dispuxeron dunha nova oportunidade con dobre penalti para dar maior comodidade ao luminoso pero Suzan interpúxose nas intencións de Jenny. A falta de 1’04”, Ale de Paz puxo o cuarto, a pase de Peque, para dar tranquilidade nas filas locais. Jenny aínda dispuxo doutra a porta baleira.
FICHA TÉCNICA
PESCADOS RUBÉN BURELA: Jozi, Cristina, Cilene, Peque, Jenny, cinco inicial; tamén xogaron Bea Mateos, Ale de Paz, Luci, Lara Balseiro
SALA ZARAGOZA: Suzan, Livia, Paola, Dedeia, Rafinha, cinco inicial; tamén xogaron Lioba, Jenifer, Sara
GOLES: 0-1, minuto 3, Livia; 1-1, minuto 14, Bea Mateos; 1-2, minuto 28, Rafinha; 2-2, minuto 30, Cilene; 3-2, minuto 32, Bea Mateos; 4-2, minuto 39, Ale de Paz
ÁRBITROS: Darriba Vilamor // Vieito Regueira. Por Burela amarela para Bea Mateos (minuto 19). Por Zaragoza amarela a Paola (minuto 24)
INCIDENCIAS: Partido correspondente á xornada 23 de Primeira División disputado en Vista Alegre, ante máis de 600 espectadores/as. Durante o descanso a Bomboneira tivo o privilexio de acoller a entrega do Torneo Biberón Fundación Imdecum 2020, coa presenza da base laranxa, AD Santiago de Foz, AD Río Ouro e Ribadeo FS.
