As galegas do Pescados Rubén Burela lograron deixar os tres puntos na casa tras un partido moi disputado ante o Móstoles. As Guerreiras Laranxas venceron por 4-3 e logran manter a estela do líder Futsi. Vista Alegre foi testemuña de dúas partes moi diferentes. As de Julio Delgado non ofreceron a súa mellor versión antes do descanso xa que foron demasiado planas e horizontais.
Tras o tempo de lecer, en cambio, o partido gañou en dinamismo e vistosidade cunhas Guerreiras máis atrevidas. O tira e afrouxa no marcador decidiuse no xogo de cinco. Jane a punto estivo de sorprender no 4 cun bonito control fronte a Miri, que se foi alto.
Antes internárase Luci, con moito perigo, e Cilene, no rexeite. Ata o minuto 6 as de Móstoles non chegaron á rede galega. Foi nas zapatillas de Desi Godoy cunha boa resposta de Ana Romero. Aínda que dispuxeron de ocasións as galegas, co paso dos minutos o perigo foise esvaendo ante unha boa labor defensiva do conxunto madrileño, que conseguiu manter o 0-0.
O segundo acto comezou con máis protagonismo baixo paus e un Pescados Rubén máis vertical. Jozi salvou a balón parado e despois tívoa Ale de Paz. Á primeira non puido ser pero pouco tardou en estrear o luminoso, en recuperación ante unha Miri moi adiantada.
Responderon as madrileñas cunha galopada de Alicia Benete que rematou nun disparo cruzado desviado e en menos dun minuto chegou a igualada, desde saque de banda, transformado por Inma. Volveu poñer perigo Jenny no 25 de lonxe.
Reacción das Guerreiras
Lara Balseiro non puido chegar, no 27, á grande incursión pola banda de Jane. As pupilas de Julio Delgado apropiáronse do esférico para centralizar as ocasións na área mostoleña. Ale de Paz, no 28, desaproveitou unha de ouro coa portería libre. As madrileñas adiantáronse no 31, con Andreza, en rexeite, desde estratexia, pero pouco lles durou a alegría; a escasos segundos Jane protagonizou o 2-2.
No 34, Ale de Paz non puido triunfar en pugna na área, pero de novo aos poucos segundos conseguiuno a 17 laranxa, en rexeite. A ex das burelistas Shiori liderou o xogo de cinco entón co 3-2 e non se fixo esperar a recompensa. Celia desde a banda sorprendeu a Jozi cun balón alto.
Con 3’52” por diante respondeu o cadro local. Bea Mateos enfundouse na camiseta de porteira xogadora e nin máis nin menos que 24 segundos despois Cilene selou, coma sempre maxistral, o 4-3. Seguiu o conxunto visitante con ataque de cinco. Andreza a punto estivo de recuperar o empate. Malia non contar co quinteto defensivo, o Burela puido manter a vantaxe e conseguiu neutralizar as chegadas de cinco do rival ata a bucina final.
FICHA TÉCNICA
PESCADOS RUBÉN BURELA: Ana Romero, Dany, Cilene, Ale de Paz, Jenny Lores, cinco inicial; tamén xogaron Jane, Lara Balseiro, Jenny, Jenny Lores, Jozi e Bea Mateos.
MÓSTOLES: Miri, Patri Chamorro, Celia, Inma, Alicia Benete, cinco inicial; tamén xogaron Andreza, Desi Godoy e Shiori.
GOLES: 1-0, minuto 22, Ale de Paz; 1-1, minuto 23, Inma; 1-2, minuto 31, Andreza; 2-2, minuto 31, Jane; 3-2, minuto 34, Ale de Paz; 3-3, minuto 35, Celia; 4-3, minuto 37, Cilene.
COLEXIADOS: Héctor Valdés // Francisco Román. Por Móstoles, amarela a Andreza (minuto 37).
INCIDENCIAS: Partido correspondente á xornada 17 de Primeira División disputado en Vista Alegre ante unhas 600 persoas.
