O Pescados Rubén Burela FS pecha ou 2019, o mellor ano da súa historia, cunhas merecidas vacacións. Campioas de I Copa de SM A Raíña, triunfadoras da 4 Nations Futsal e da Supercopa de España. Ademais, levan unha primeira volta na actual tempada na que só concederon un empate e unha derrota e segue a estela do Futsi. Con esta equipaxe, as de Julio Delgado toman unha semana de descanso para retomar con enerxía e forza o comezo de 2020.
As Guerreiras Laranxas retomarán os adestramentos o luns 30, con oitavos da Copa da Raíña como primeiro destino, na pista do Viaxes Amarelle FSF, o sábado 4, ás 18.00 horas.
Premiadas na II Gala do Fútbol Sala da RFEF
O Pescados Rubén Burela FS brillou, o pasado 19 de decembro, na II Gala de Fútbol Sala da RFEF, con recoñecementos colectivos e individuais na tempada 2018-19. Entre os máis de 60 galardóns que concedeu a Federación, o vicepresidente laranxa, José Luis Sáez, recibiu o premio como campioas de Copa da Raíña e Supercopa de España Feminina, xunto a Pedro Rocha, presidente do Comité Nacional de Fútbol Sala, e Gonzalo Azkárate, membro do comité executivo.
A internacional Peque recolleu o premio como Mellor Xogadora da Tempada, outorgado por compañeiros e compañeiras, ademais de subir ao escenario, xunto á tamén burelista Luci, polos éxitos da Selección Española, como campioa de Europa, e bronce nos Xogos da Xuventude de Bos Aires.
