O Pescados Rubén Burela álzase co seu terceiro campionato de Liga

      O Pescados Rubén Burela gañou (3-2) final contra o AD Alcorcón FSF polo título de Primeira División de Fútbol Sala feminino disputada no Palacio de Deportes José María Martín Carpena en Málaga. O equipo galego chegaba como gran favorito para levarse o entorchado, pero coa desvantaxe de non coñecer cal era a forma física das súas xogadoras, nin o ritmo ao que poderían competir. O conxunto alfareiro, pola súa banda, viña de xogar un partido con dúas prórrogas e unha tanda de penaltis, con toda a carga de esforzo que iso supoñía.

O encontro comezou cun ritmo un pouco máis baixo que a semifinal, cos dous equipos tanteándose e con problemas para sacar o balón na zona alta. No minuto 2, a porteira das Guerreiras Laranxas, Jozi, salvou ao Burela de encaixar o primeiro gol, tras parar un tiro da galega Vane Sotelo dende borde da área. Nos dez primeiros minutos da final, o conxunto mariñés foi carburando pouco a pouco, volvendo a coller a dinámica de xogo e disputando posesións máis longas. Pola súa banda, as madrileñas tentaban xogar dun xeito máis directo, enviando o balón á pivote como xa fixeran contra o Ourense Envialia.

No minuto 14, Peque sacou de banda, o balón rebotou no pé de Ballesteros e Estela, que non espera ese desvío, non puido facer nada para evitar que o esférico se colase na portería. Pero a alegría durou pouco no equipo laranxa. Un minuto despois, unha boa xogada ensaiada nun saque de esquina deixaba soa no segundo pau a Estela Cantero, quen só tivo que empurrar o balón para colocar o 1-1 no marcador. A falta de dous minutos para chegar ao tempo de lecer, Peque iniciaba unha contra moi prometedora e ao chegar ao área, era agarrada por Nere Moldes. Aínda que nun inicio os árbitros non sancionaron nada, finalmente pitarían penalti tras revisalo.  Unha pena máxima que sería convertida por Jenny Lores. O Alcorcón reaccionou moi ben e empatou a final antes de ir aos vestiarios. Vane Sotelo foise dende a banda cara a dentro e cun disparo raso e forte bateu á gardarredes mariñesa.

O Pescados Rubén Burela non conseguiu consolidar a dúas vantaxes no electrónico

Os primeiros cinco minutos da segunda metade foron calcados aos da primeira. Moitas imprecisións por parte de ambos conxuntos, cun Burela deixou de facer o xogo ao que estaba acostumado, xa que as de Piru mantiveron unha presión mentres o físico as respectou. No minuto 27, Estela sacou unha boa man a baixo tras un tiro de Peque, que foi a máis activa en ataque das Guerreiras Laranxas. Sería esta xogadora a que, no minuto 32, abriu a banda para Jane e esta asitiu a Jenny para que anotase o terceiro gol das lucenses na final e puxese ao equipo de Julio Delgado máis preto do título.

O Alcorcón conseguiu empatar como na primeira parte e, a falta de dous minutos e medio para o remate do encontro, comezou a xogar con cinco con Carmen Alonso. Conseguiron que ao Burela lle durase moi pouco o balón nos últimos intres do partido, pero finalmente a estratexia non deu resultado e foron as galegas as que se levaron o título ao gañar o partido por 3-2. https://twitter.com/rfef/status/1277287489347235843?s=20

FICHA TÉCNICA

PESCADOS RUBÉN BURELA: Jozi; Dany, Cilene, Peque e Ale de Paz (quinteto inicial). Tamén xogaron Cristina, Cami, Jenny, Jane, Bea Mateos e Jenny Lores. AD ALCORCÓN FSF: Estela García; Aida de Miguel, Irene Samper, Vane Sotelo e Carmen Alonso (quinteto inicial). Tamén xogaron Estela Cantero, Ballesteros, Nere Moldes, Pipi e Cyn Romano. GOLES: 1-0, min. 14 Ballesteros (pp) 1-1, min. 16 Estela Cantero 2-1, min. 19 Jenny Lores (p) 2-2, min. 19 Vane Sotelo 3-2, min. 32 Jenny COLEXIADOS: García Hernández, do comité tinerfeño e Moreno Millán, do comité catalán. Viron o cartón amarelo Jenny polo Pescados Rubén Burla e Vane Sotelo polo AD Alcorcón FSF. INCIDENCIAS: Palacio de Deportes José María Martín Carpena. A porta pechada.