Unha tempada irregular estase a traducir en sensacións irregulares para o Peluquería Mixta Friol. As galegas compiten nunha Liga Reto Iberdrola moi disputada, na que a falta de cinco xornadas ocupan a penúltima posición. Por moi crítica que poida parecer a situación a reacción é aínda posible xa que as lucenses están a so dous triunfos (6 puntos) do cuarto clasificado. En xogo hai 15 puntos polo que as posibilidades de evitar xogar os play offs de descenso están aí a tiro de pedra.
Este é o seu segundo curso na Reto Iberdrola, aínda que xa competiu con anterioridade na segunda categoría do fútbol español. Nesta tempada o Friol enfróntase cada fin de semana a equipos de moi alto nivel: desde filiales como o Atlético de Madrid B e o Madrid CF B, ata favoritos para o ascenso como o Oviedo Moderno ou o Rácing Féminas. A competividade e o nivel da categoría e moi alto e a exigencia tamén. Un equipo con menos recursos precisa esforzarse o dobre para poder acadar éxitos.
Novidades no plantel
Despois de estar ao borde do descenso o curso anterior, as expectativas das galegas para este ano estaban máis altas, confiando en aprender dos erros cometidos na 19/20.
Para iso, o plantel conformouse na súa maioría con novas incorporacións como Amani Bernadette, Noelia Díez, Sara García, Lara Martínez, Nerea González Cuquejo, Ángela Mera, Ariadna Castañeda, Mónica Barreiro, Laura Portabales, Tamara Álvarez e Mio Nemoto, que se suman a outras habituais nas filas do Friol como Natalia Llames, Aroa Nata, Laura de la Torre ou Fanny Varela.
Así mesmo, tamén cambiou o corpo técnico. Abraham García e María Castellano comezaron a tempada dirixindo o equipo ata que, o pasado 17 de decembro, a directiva decidiu destituilos. O novo adestrador, José Manuel González, xunto co seu axudante Sergio Carrasco, foi anunciado o 12 de xaneiro, a falta de cinco partidos para finalizar a competición á procura dun revulsivo nesta recta final da competición regular.
Os números están en contra do Friol
A sorte non está acompañando ás galegas, que teñen dificultades para atopar a portería contraria, sendo o equipo menos goleador da categoría, mentres que son o segundo que máis recibe.
O inicio do curso 20/21 foi complicado, cun empate seguido do primeiro tropezo do ano, a derrota ante o Oviedo Moderno. Este foi o primeiro duelo perdido de moitos, aos que seguiron o Atlético de Madrid B e o Pozuelo de Alarcón.
Desta forma, as de Friol só foron capaces de vencer ao CD Parquesol. Foi na quinta xornada da competición, nun partido no que as galegas adiantáronse no marcador cun tanto de Lucía Pardo, pero no que case perden os tres puntos tras un gol no 88 da rival Natalia Arranz. A un minuto do final, un gol de Agnes Nkada deulle a tan necesaria vitoria ás do Friol, que volveron a casa coas pilas cargadas.
Case cinco xornadas despois, as futbolistas non volveron a coñecer a vitoria. Na seguinte semana, conseguiron rascar un punto recibindo en casa ao Madrid CF B, no que foi o seu segundo empate da tempada despois do debut, ante o CDE Rácing Féminas.
Un rival que para o inicio da segunda volta superou con creces ao conxunto entón dirixido por Abraham García. Cun 3-0 no marcador, o Friol despedía o 2020 con malas sensacións.
O estreo do 2021 non foi moito mellor. As galegas volveron a encaixar tres tantos, desta vez do líder, o Oviedo Moderno, ao que conseguiron marcar o gol da honra.
A salvación aínda é posible
Só dúas vitorias (é dicir, 6 puntos) separan ao Friol do cuarto clasificado, o Madrid CF B. Con 15 puntos aínda en xogo, as galegas aínda teñen posibilidades matemáticas abondo para pensar en evitar xogar os play offs de descenso.
Pero para iso, o equipo agora ás ordes de José Manuel González, deberá aprobar o primeiro reto: vencer ao CF Pozuelo de Alarcón o próximo 17 de xaneiro ás 16:00 horas. No partido de ida, xogado en Galicia, o resultado foi de 0-1, polo que as friolesas deben dárlle a volta ao marcador.
CD Parquesol, Madrid CF B, Real Sporting de Gijón e Atlético de Madrid B serán as probas finais que teñan que superar as galegas para manter a súa praza na segunda mellor división do fútbol español.
Fanny: “Esta tempada estamos mellor preparadas e aspiramos a estar no máis alto”
