Peque, intervida con éxito dun problema na rótula

O Pescados Rubén Burela comunicou a intervención á que foi sometida Patricia González Mota, Peque, polo seu problema rotuliano mediante cirurxía minimamente invasiva.

A operación foi levada a cabo no Hospital Polusa da cidade de Lugo, a través do doutor Adrián Gallego Goyanes, especialista en cirurxía ortopédica e traumatoloxía deportiva, traumatólogo de referencia no club  da Mariña integrado nos servizos médicos da entidade.

Segundo aseguran desde o Pescados Rubén Burela “Esta intervención levouse a cabo con notable éxito e sen ningún tipo de complicación. Tamén foi clave a excelente organización da RFGF e da Mutua de Futbolistas en Galicia, pois desde a súa lesión, ambas as institucións actuaron con profesionalidade en todo momento, facilitando que nosa querida xogadora puidese ser intervida en tan boas condicións”.

No Burela so pensan na recuperación de Peque

Desde o club lucense agora so pensan en que Peque, “peza fundamental na escuadra mariñá para o seu crecente éxito, cada vez está máis preto de incorporarse de novo á dinámica do equipo”.