A capi, Peque, seguirá a ser Guerreira Laranxa defendendo as cores do Pescados Rubén Burela FS.
A número 7 laranxa é todo un exemplo dentro e fóra da pista. Ademais de ser a capitá das Guerreiras Laranxas, Patricia González Mota, Peque, é tamén un referente fora do campo apoiando valores compartidos co club da Mariña, como a loita polos dereitos das mulleres deportistas e a igualdade no deporte.
Por iso desde CD Burela FS anuncian con fachenda que “Peque seguirá formando parte da plantilla feminina a próxima tempada e que as Guerreiras Laranxas seguirán estando capitaneadas pola mellor xogadora europea”.
A á-pivot madrileña é unha mariñá máis, sendo desde hai anos unha dos principais baluartes dos éxitos deportivos e sociais do club lucense. A 2022-23 será a décima tempada de Peque no noso equipo e tras o seu regreso en 2018 o CD Burela FS enlazou unha serie de anos espectaculares gañando multitude de títulos.
Unha serie de vitorias desde xuño do 2019 que marcaron o récord de 1.000 días sendo campioas de todos os torneos xogados. Na súa traxectoria como xogadora do Pescados Rubén Burela, Patricia González Mota logrou 4 Supercopas, 5 Copas de S.M. a Raíña e 4 Campionatos de Liga. Tamén o campionato da Futsal Women’s European Champions e a consecución dous anos seguidos do Mellor Equipo Feminino do Mundo nos Futsalplanet Awards.
Peque gañou títulos co Burela e coa Selección Española
Nas dúas últimas edicións dos Futsalplanet Awards, Peque tamén foi nomeada segunda mellor xogadora do mundo, e este mesmo ano logrou a súa segunda Eurocopa xogando coa Selección Española no Europeo Feminino de Portugal.
