Cinco puntos para a salvación, nove en xogo. O Dépor ABANCA ten por diante as tres finais definitivas, nas que debe asegurar a súa presenza un ano máis na Primera Iberdrola. A primeira delas será ante o Granadilla Tenerife, este sábado, 5 de xuño, ás 13:30 horas.
As deportivistas afrontarán este duelo co calor do seu público na bancada, xa que xogarán no verde de Abegondo. O rival non o porá nada fácil, xa que as canarias son o sétimo mellor equipo como visitante, sumando 21 puntos xogando a domicilio.
Coa parte superior da táboa xa decidida, o Granadilla Tenerfie desprazarase a terras galegas en busca de seguir sumando boas sensacións para rematar a tempada. Un escenario moi distinto ao do Dépor ABANCA, que se debate entre a permanencia e o descenso.
O Dépor ABANCA é o equipo mellor posicionado para saír do pozo
A falta de tres xornadas para finalizar a competición, o Dépor ABANCA é o 15º posicionado, con 25 puntos obtidos en sete vitorias e catro empates despois de 31 partidos disputados.
O primeiro equipo salvado, o SD Eibar, suma cinco puntos máis, un total de 30. Pola parte baixa, as últimas posicións están moi igualadas. Entre o Dépor ABANCA e o colista, o EDF Logroño, só hai dous puntos de diferencia.
O rival desta xornada para as branquiazuis móvese en posicións moi distintas. O Granadilla Tenerife é o sexto clasificado, con 53 puntos e unha vintena de goles a favor máis que as coruñesas e case o dobre de vitorias (16 fronte a 7) e a metade de derrotas.
Atendendo ás últimas semanas, as canarias levan un peor balance que as galegas. Só venceron nun dos últimos cinco partidos, concretamente o da última xornada disputada, ante o Sevilla FC.
Pola súa banda, o Dépor ABANCA sumou sete puntos dos últimos 15 posibles, con dúas vitorias e un empate, ante Espanyol, Madrid CFF e Valencia respectivamente.
O obxectivo aínda é alcanzable e o vestiario vése con confianza para acadalo. En rolda de prensa, a defensa Noelia Villegas confirmou o compromiso das xogadoras.
Noelia Villegas: “Non imos deixar de intentalo ata o último momento”