O XXI Tríatlon do Concello de Oleiros deixou como campioa absoluta a Penélope Martínez. A proba deu inicio á tempada do Tríatlon Galego 2021 e celebrouse na praia de Mera.
Esta proba popular levouse a cabo seguindo todos os protocolos necesarios de seguridade sanitaria, por mor da COVID-19. O circuíto comprendeu 750 metros de natación, 17,8 km en bicicleta e 5,8 km de carreira a pé.
O podio absoluto en Oleiros
O ouro na categoría absoluta foi para Penélope Martínez, do Triatlon Arteixo, acadando a meta en 1:22:03, despois de facer a proba de natación en 0:11:54, a de ciclismo en 0:44:39 e a carreira en 0:23:22.
Case tres minutos por debaixo, Marta Barbeito, do AD Náutico de Narón, chegou en segundo lugar, colgándose a medalla de prata. Finalmente, Eva Piñel, do Triatlonciem, pechou o podio cun tempo de 01:26:04.
O resto das vencedoras
Na categoría xuvenil feminina Marta González, da AD Fogar, acadou a primeira posición. En júnior, o ouro foi para Andrea Expido, do Club Triatlon Coruña. No sub23, Eva Piñel, do Triatlonciem foi campioa.
Nas veteranas houbo dous ouros, o de Lucía Novoa, do Atletismo Porriño, no grupo 1 e o de Purificación López, do Hércules Temaria, no 2.
