As deportistas galegas Vero Boquete e Ana Peleteiro están incluídas na lista de deportistas aspirantes a formar parte do ‘Top 100 Mujeres Líderes en España’,unha elección das 100 mulleres máis influíntes de España que desde o ano 2011 ten en marcha a publicación Mujeres & Cía. Este ránking ten por obxecto “facer cada vez máis visibles a mulleres notables nos seus ámbitos de actuación e que as súas voces se escoiten nos centros de poder, onde se deciden as cousas que importan”.
Unha vez seleccionadas como candidatas, a triplista Ana Peleteiro e a futbolista Vero Boquete se incorporan á listas de mulleres que poden ser votadas polo público para seleccionar as que, definitivamente, serán as Top100 deste ano.
En total hai 10 categorías e as votacións están abertas até o 16 de marzo. Se queres participar na votación ás mulleres Top 100, faino aquí
Esta é a lista de deportistas que compiten con Peleteiro e Vero Boquete
Na lista das aspirantes a Top100 no apartado de cultura e deporte ademais de Vero Boquete e Ana Peleteiro, están tamén outras mulleres deportistas como a atleta Sandra Corcuera (Retro Running Association), as xogadoras de baloncesto Laia Palau e Alba Torrens, as futbolistas Jenny Hermoso, do Fútbol Club Barcelona, e Amanda Sampedro, do Atlético de Madrid, a karateka Sandra Sánchez, a campiona do mundo de kitesurf Gisela Pulido, a piloto de trial, enduro e rallies Laia Sanz, a levantadora Loida Zabala Ollero, a haltera Lidia Valentín, a tiradora de esgrima Teresa Díaz, a judoca paralímpica Marta Arce, a boxeadora Joana Pastrana ou a colexiada de fútbol Guadalupe Porras.
24 galegas aspirantes na suma total de categorías
Desde a Asociación Executivas de Galicia destácase que, á marxe do deporte, nesa lista de candidatas ao Top 100 de Mulleres máis influíntes de España, conformada por unhas 1.000 mulleres, hai unha “ampla representación galega”. Así, explican que constan na relación “empresarias, directivas ou deportistas”, pero advriten que so hai unha categoría sen galegas: “o terceiro sector”.
Tal e como apunta a Asociación Executivas de Galicia, as 24 figuras galegas candidatas á edición de 2021 ao Top 100 nas dez categorías en liza son:
- África González, Ana García Cabado, Marisol Soengas, Ana Freire, Mabel Louza e Manuela Camino López na categoría de Académicas e Investigadoras.
- Luisa Lorenzo, Adriana Domínguez, Carmen Lence Ferreiro, en categoría de Empresarias.
- Ana Peleteiro e Verónica Boquete na categoría de Cultura, Lecer e Deporte.
- Tesa Díaz-Faes, Marta Fernández Currás, e Natalia Seoane en categoría de Directivas.
- Nadia Calviño, Irene Souto Blázquez, Susana López Abella, Yolanda Díaz e Carla Reyes Uschinsky en Función Pública, institucional e política.
- Ana Pardo de Vera en categoría Medios de Comunicación.
- Paula Carreira na categoría de Alta Dirección.
- Diana Lameiro Aznar, Mónica Seara Seara e Susana Quintas Veloso en categoría Startups e PEME.
