Por se quedaba algunha dúbida, xa é oficial. Ana Peleteiro e Belén Toimil competirán nos Xogos Olímpicos de Toquio 2021, formando parte da Selección Española de Atletismo.
O seleccionador José Peiró deu a coñecer a lista oficial das deportistas que acudirán á gran cita, tras o peche do World Ranking e a publicación das listas de admisión de World Athletics.
Tanto Peleteiro como Toimil acuden a Toquio con grandes resultados nesta tempada, e ambas son plusmarquistas, a primeira delas no triple salto, cun 14.73, e a segunda en lanzamento de peso, cun 18.80.
Un ano de éxitos para Peleteiro e Toimil
Ana Peleteiro buscará o metal nos Xogos Olímpicos despois de vencer no estatal de triplo salto no Campionato Absoluto de Pista Cuberta, ser prata no Europeo da mesma modalidade, segunda clasificada no Meeting Ibiza 2021, e proclamarse campioa no triplo salto do Campionato Absoluto ao Aire Libre.
Ana Peleteiro cólgase o ouro no triplo salto, coa mellor marca española do ano e ao aire libre
Ante a súa convocatoria oficial, Peleteiro anunciou a súa presenza nos Xogos Olímpicos recordando os últimos cinco anos de prepraración, cos que tras “moito traballo, sacrificio e dedicación faise realidade un soño. Estou feliz e con máis ganas e ilusión que nunca”.
Ana Peleteiro: “Estou feliz e con máis ganas e ilusión que nunca”
Ver esta publicación en Instagram
Pola súa parte, Belén Toimil, quen respondeu á publicación de Peleteiro cun “A POR TOQUIO”, tamén leva unha tempada de éxitos, batendo constantemente os seus propios récords.
O billete olímpico chegou no Campionato de Europa, cando a de Mugardos lanzou até os 18.01, rematando na sétima posición. Pouco despois, a lanzadora tivo un pequeno obstáculo no camiño, finalizando décima na Copa de Europa de Lanzamentos.
Porén, a atleta rexurdiu de novo, para ser quinta no Europeo de Nacións, ouro na final polo título de División de Honor, e de novo triunfadora no Campionato de España de atletismo ao aire libre, no cal estableceu un novo récord estatal.
Só catro días despois, Toimil bateu o seu propio récord, chegando ata os 18.80 metros no Meeting de Castellón.
Belén Toimil bateu o seu propio récord estatal de lanzamento de peso cunha marca de 18,80m
Co anuncio oficial da súa convocatoria, a mugardesa declarou que “aínda non mo creo pero por fin, hoxe, estou oficialmente seleccionada para asistir aos Xogos Olímpicos de Toquio 2020. O soño de toda a miña vida vaise facer realidade”.
Belén Toimil: “O soño de toda a miña vida vaise facer realidade”
A atleta agradeceu o apoio do seu adestrador, Carlos Burón, e asegurou que “foi un longo e duro camiño, cheo de traballo pero sobre todo cheo de ilusión e paixón polo que facemos. E esta é a mellor recompensa”.
Toimil finaliza a súa mensaxe agradecendo a confianza e apoio recibido e afirmando que “imos escachar esa bola en Toquio!”.
Ver esta publicación en Instagram
A delegación máis numerosa
Ata 56 atletas representarán ao equipo español, 24 delas mulleres e dúas delas galegas. Segundo informa a propia Federación, esta é a cifra máis alta de participantes femininas da historia, igualando á de Sidney 2000. O atletismo será o deporte con maior representación dentro da delegación olímpica española.
