As redes sociais futbolísticas fervían hoxe cun cancelo repetido desde terras galegas: #PekeSelección.
É certo que o fútbol é o máis importante das cousas menos importantes. Tamén é certo que este fabuloso deporte ten cousas que ninguén pode explicar. Isto vai de pel, vai máis aló de darlle patadas a un balón, de 22 xogadoras deixándose a vida sobre o verde. O fútbol vai de sentimentos, de emocións, pero tamén vai de números. A menudo, as persoas guiámonos por sensacións ou percepcións, pero os datos, coma o algodón, nunca enganan.
Hoxe saíu a convocatoria das 23 elexidas de Jorge Vilda para a #SheBelievesCup. 23 nomes nos que non está representado o fútbol galego. Non parecen suficientes os 14 goles que leva Peke nas 20 xornadas de Liga, nin o póker que fixo en Riazor ante o Valencia nos oitavos de final da Copa da Raíña. Tampouco pareceu chamar a atención as 12 asistencias que suman Athenea del Castillo e Tere Abelleira, seis cada unha. A 9 e a 3 están a deleitar en cada partido que xogan e marcar as diferenzas a pesar da xuventude que atesoran.
Non parecen suficiente para Vilda os 14 goles que leva Peke en 20 partidos nin as 12 asistencias que suman Athenea e Tere Abelleira entre as dúas
O Deportivo ABANCA está a debutar e sorprender na máxima categoría do fútbol femenino. O seu fútbol de toque, a súa afección que nunca deixa de animar e unhas xogadoras que teñen ao equipo entre os catro mellores da Liga Iberdrola, parece que tampouco merecen premio. O Dépor desprende felicidade, bo rollo e un fútbol de moitos quilates. Pero tamén conta con estatísticas de equipo grande. Cifras que son incontestables ante unha falta de empatía polo fútbol feito en Galicia.
Chama moito a atención que o seleccionador convoque a xogadoras de cinco dos seis equipos que están a encabezar a Liga Iberdrola, e que curiosamente, o Dépor ABANCA sexa o único que non está representado na lista.
Nahikari, da Real Sociedad foi convocada polo seleccionador pese a estar lesionada. Ocupa a mesma demarcación que Peke
Chama tamén poderosamente a atención que vaia unha xogadora que está lesionada como é o caso de Nahikari. Non polo feito de que sexa a xogadora de Urreita, que na miña opinión, creo que é unha xogadoraza e no caso de estar sa debería de estar entre as 23 mellores. Para máis inri, ocupa a mesma demarcación que Peke, coa que comparte lugar de nacemento: Euskadi. Din que a ocasión a pintan calva, pero Vilda volve obviar o talento con acento galego.
O caso vai máis aló, cada equipo que pasa por Abegondo eloxia e ríndese ante o fútbol e a calidade das xogadoras deportivistas, pero parece que as gaitas non soan do mesmo modo na Cidade Deportivas de Las Rozas.
O caso vai máis aló, cada equipo que pasa por Abegondo eloxia e ríndese ante o fútbol e a calidade das xogadoras deportivistas, pero parece que as gaitas non soan do mesmo modo na Cidade Deportivas de Las Rozas
É curioso, se me permitides, que ante este momento doce do fútbol galego feminino non teñamos ningunha representante na Roja. Ao outro lado do charco, alá por terras americanas están a gozar do fútbol de Vero Boquete. A Selección absoluta viaxa a terras yankees e Vilda privará de novo de que Vero se poida reecontrar coas súas ex compañeiras no combinado estatal.
Tampouco pareceu chamar a atención de Vilda o recente récord acadado por Mari Paz Vilas co Valencia. A arousá superou a dous grandes iconos valencianistas como máxima goleadora histórica do club, adiantando a dúas lendas como son o David guaje Villa e Mario Alberto Kempes, o matador.
O acento galego parece non gustar na Rozas, pero no fútbol unha cousa hai clara: os números, como o algodón, nunca enganan
O propio Vilda aseguraba, preguntado pola prensa, que Peke está “moi preto de chegar á Selección”.
