A goleadora deportivista Peke apuntou en rolda de prensa virtual que no contempla a posibilidade de que a competición na Primera Iberdrola se suspenda por mor do coronavirus Covid19. “Son decisión moi difíciles. Pero pola miña cabeza non pasa anular a competición. Haina que rematar”, di a futbolista do Dépor ABANCA.
No seu argumentario, Ainize Barea explica que no caso da máxima categoría do fútbol feminino español, na que milita o Dépor ABANCA, quedan oito partidos por se disputar e “xogando entre semana, nun mes rematados a competición”. Con todo, matiza que todo “vaise ver dependendo de ata cando dure esta situación”.
Mentres, as xogadoras que adestra Manu Sánchez manteñen a forma físico con traballo individual nos seus domicilios. “Temos que adaptarnos a adestrar en casa”, explica a dianteira vasca. “Traballamos mobilidade, forza e mantemos o ton físico”, detalla.
Rutinas diarias de exercicio que manda a preparadora física
En concreto explicou aos medios que a preparadora física, Lucía, envíalles “a diario unha rutina para manter e mellorar o estado físico. Cando volvamos á normalidade veremos se este traballo que facemos nos alonxa do estado previo. Mándasenos tarefa para facer sen material, dado que non temos un ximnasio na casa. Eu teño unha bici estática, pesas e cintas. Fago unha hora e media diaria de adestramento. Traballamos para cando que, cando volvamos, poidamos seguir a competir como o estabamos a facer”.
Para Ainize Barea racha goleadora que estaba a ter non é relevante: “Marcar goles ou non, son rachas. Xa se verá se sigue ou non”. Ela dálle máis peso ao grupo: “Espero que o Dépor ABANCA compita da mellor maneira posible e poda quedar na mellor posición posible”.
“Son caseira e tento ter a mente positiva”
Desde a súa casa na Coruña, á que retornou xusto antes da declaración de estado de alarma (o Dépor ABANCA tiña vacacións por un parón competitivo previo), Ainize Barea di que aproveita esta etapa para “darlle caña aos estudios e facer as series que nos manda a preparadora física. Intento facer cousas novas como bailar zumba para moverme, ver series… facer cousas diferentes cada día”.
Afirma que non leva mal o confinamento xa que é “bastante caseira”. Pero admite que “non saír a tomar o aire fai os días costa arriba. Tento ter unha mente positiva e despexada. Entreterme cada día”. Nese sentido afirma que precisamente “facer exercicios físicos axuda a ter a mente despexada”.
Non lle preocupa perder o olfato de gol ou no tocar balón
O día a día dunha futbolista sen tocar balón é complicado. E unha dianteira sen unha portaría que perforar durante, a lo menos, semanas, tamén supón un reto. Peke conta que na súa casa non está a ter moito contacto co balón.
“A verdade e que so teño os dous que están asinados polas miñas compañeiras (en referencia aos que levou por anotar hat tricks) e non os quero tocar moito. Pero o de marcar goles… lévase ou non se leva. Así, tamén os deixamos para cando volvamos á competición facelo con máis ganas”.
Peke: “Intentaremos que este parón non nos afecte”
Admite Peke que aínda que traballen na casa, este parón “a nivel físico algo ten que afectar. Non é o mesmo traballar no campo que adestrar na casa. Pero para iso estamos a traballar a diario. O estado de forma ou se estaba marcando goles non é o máis imporante agora. Todas imos empeza de cero. Todas intentaremos que este parón non nos afecte”.
Para manter a cohesión do bloque, desde o grupo de whatsapp do primeiro equipo feminino do Dépor xogadoras e corpo técnico teñen un contacto diario. “Intentamos facer cousas cada día, falar, ver que almorzamos… Trátase de manter ao grupo en contacto”, di Peke.
A ariete branquiazul di que non cre que este tempo de inactividade afecte ao grupo. “Todas somos conscientes da situación. Cando volvamos á normalidade seguiremos igual que antes. O grupo e o primeiro. Os xogos psicolóxicos que facemos co corpo técnico nos axuda a sorrir”, desvela.
Unha tempada atípica para o Dépor ABANCA
Sobre a situación que se vive a raíz do coronavirus Covid19, confesa a deportivista que ao principio “non pensei que fora chegar a tanto. Pero cada vez aumenta a preocupación e a incertidume polo que vai pasar”.
Nesta tempada o futfem español acadou o seu primeiro convenio colectivo e hai quen se pregunta se esta situación afectará a cuestións coma iso ou como repercutirá na economía dos clubs. Reflexiona a dianteira vasca sobre que moitas empresas “van estar moi afectadas por esta inactividade. No caso do fútbol feminino non sei que vai acontecer. Pero coido que todo o que temos conseguido agora ímolo tentar manter”.
Este é o primeiro ano en Primeira do Dépor ABANCA e o bloque está a pasar de todo. Peke lembraba fitos como “a folga, as papeiras, e agora isto. Cando pasen os anos lembraremos todos estes momentos que estamos a vivir nesta tempada”.
Tamén pensando con perspectiva, confesa ter “medo de que todo o que temos conseguido quede nun segundo plano, aínda que non sexa o máis importante. Pero cando volvamos á normalidade, quero que a xente saiba todo o que o Dépor ten conseguido neste primeiro ano en Primeira”.
Comprometida co proxecto deportivista e despreocupada pola Selección
Aínda non hai moito que Peke asinaba a súa renovación co club coruñés. A futbolista di que tras tres tempadas no club herculino está “moi feliz e moi a gusto, por iso decidín renovar tres anos máis”. Explica que lle “gusta o proxecto e as ganas de crecer que ten o RC Deportivo”.
Antes do parón competitivo Peke vivía un excelente momento de forma e unha racha goleadora que daba envexa, pero aínda así, non recibiu a chamada de Vilda, adestrador da Selección Española absoluta.
A ela non lle quita o sono. Sostén que “non ir á Selección non foi para min un pau. É verdade que estaba nun bo momento, as estatísticas están aí. Pero o seleccionador fixo o que creu mellor desde o seu punto de vista. Que diga que estou cerca de entrar é unha motivación. Oe! Está atento ao meu nome. Ogallá teña ese premio, pero tampouco é un obxectivo. É un premio polo bo traballo feito, xa se verá se se da ou non. Vaia ou non, eu serei igual de feliz.
Preguntada sobre como podería afectar a situación do primeiro equipo masculino ao resto do club admite que é un pouco “complicada”, pero espera “que pronto estea onde ten que estar, que é en Primeira. Se iso sucedese, sería unha axuda para todas as categorías do club”, confirma.
