O Campionato de España máster de Pista Cuberta que se celebrará en Ourense a finais deste mes de novembro ten a dúas protagonistas galegas. Esther Pedrosa e Emilia Mesa acuden á cita en calidade de favoritas.
As inscricións para esta proba, que terá lugar o 26, 27 e 28 de novembro, pechan este xoves ás 23:59 horas, e a organización estima unha participación de máis de 1.200 participantes. Por comunidades, tal e como informa a Federación Galega de Atletismo, é precisamente Galicia a que ten un maior número de inscritos cun total de 206 participantes, seguida pola Federación madrileña con 179 e da Federación andaluza con 135.
Esther Pedrosa e Emilia Mesa confirman a súa presenza en Ourense
A notable calidade do atletismo máster galego estará representado amplamente en Ourense, onde entre outras, estará presente Esther Pedrosa quen xa o pasado día 23 de outubro establecía en Antequera un sensacional récord mundial sobre a proba dos 3.000 m. cun crono de 11:11.16.
A maiores Pedrosa, está a facer un ano para enmarcar logrando, ata o momento, un total de seis récords de España na distintas modalidades de ruta, aire libre e pista cuberta.
Continuando na categoría femenina, a atleta Emilia Mesa do Ourense Atletismo será outra das participantes importantes nesta edición. A máster ourensá, plusmarquista nacional en pista cuberta das modalidades de peso F60 e F65 estará competindo sobre este mesmo concurso.
Sen abandoar o círculo de lanzamento de peso, outra non menos importante presenza será a da xavelinista F55 e tetra olímpica rumana, afincada dende fai varios lustros en Galicia, Felicia Tilea, quen aportará calidade e talento a este evento
Xunto a elas, e a falta de confirmación, tamén poderían estar as e os plusmarquistas nacionais, Domingo Álvarez do Burgas Ourense quen recentemente lograba o récord nacional nos 800 m. ao aire libre cun rexistro de 2:21.44 ; José Miguel López nos 60 valos, Flora Josefa Guzmán nos 200 m ou Soledad Castro sobre os 3.000 m.
No apartado das baixas, unha das máis importantes será a do atleta máster 80 do Atletismo Narón Pepín Rioseco quen acumula nada menos que un total de dez récords mundiais e un europeo. O multiplusmarquista confirmábanos a súa ausencia por mor dunha leve encordadura de xeonllo que o terá parado ata o vindeiro mes de xaneiro.
Ourense, sede do torneo máster
En cuestión de días, a cidade de Ourense volverá a ser o epicentro do atletismo máster con esta competición en pista cuberta. Desde a Federación Galega de Atletismo aluden á repercusión económica que terá esta cita na cidade das Burgas o feito de acoller un dos eventos con máis participantes directos e indirectos dos campionatos de inverno.
Esta categoría enténdese máis aló do deportivo, con especial importancia do lecer das deportistas, tendo en conta a gastronomía, paisaxe, cultura e comercio da localidade anfitrioa.
As atletas competirán na pista de atletismo inauguradas no 2017 e que desde entón acolleron ata 68 probas oficiais. 34 delas foron Controis, 31 Campionatos de Galicia e 3 foron estatais, como o Campionato de España sub20 do 2018 ou o Campionato de España Máster do 2019, así como o Campionato Nacional Absoluto.
A 32ª edición da proba estatal máster celebrará ademais o centenario da Federación Galega de Atletismo, cunha proba na casa para as atletas máster como Pedrosa ou Mesa.
