Esther Pedrosa segue a facer historia. Na pasada fin de semana, a atleta santiaguesa e Concelleira de Deportes da cidade compostelá, logrou unha nova proeza, a de establecer un novo Récord do Mundo nos 3.000 metros lisos F60.
A galega obtivo a súa marca na pista cuberta de Antequera durante o transcurso dunha competición oficial na que a atleta de Playas de Castellón tomaba parte sobre a proba dos 3.000 m. Desde xa o primeiro momento, e sabedora do bo estado polo que se atopa, Pedrosa efectuaba os tempo de paso cuns rexistros que facían presaxiar algo importante ao final da proba.
Unha marca para a historia
A súa marca de 11:11.26 confirmaba esas sensacións, convertíndoa na nova plusmarquista mundial da distancia logo de mellorar os 11:16.54 da xermana Lidia Zentner efectuados no ano 2014.
A galega acumula, ademáis do seu flamante récord mundial, outros importantes rexistros como son os 14 récords de España vixentes así como unha importante cantidade de títulos e podios tanto a nivel nacional como internacional pola que sería recoñecida xa no ano 2018 ca distinción de mellor atleta nacional máster pola RFEA, tal e como recordan desde a Federación Galega.