O pavillón de Os Remedios, en Ourense, foi a pasada fin de semana escenario das evolucións sobre o tapiz dos mellores conxuntos de ximnasia rítmica de Galicia nunha nova edición do Campionato Galego de Ximnasia Rítmica de Conxuntos, organizado pola Federación Galega.
O sábado, celebrouse o torneo e Control Copa España, co club Ximnasia Pavillón como gañador en sénior e o domingo o trofeo base, co As Triscas como mellor equipo en Base-Xuvenil.
Dous ouros e un bronce para o Ximnasia Pavillón
O día 19 de decembro, equipos de ximnasia rítmica de distintos puntos de Galicia reuníanse en Ourense para o campionato de conxuntos e o control Copa de España. A xornada comezou ás 15:10 horas, coa entrada dos primeiros conxuntos en categoría benxamin, alevín e infantil, con cinco equipos en total (Ximnasia Pavillón, Maniotas, Acordes, Acordes Pontedeume e Escola Ximnasia Acordes).
No primeiro nivel, o ouro foi para o Acordes Pontedeume. En alevín, o primiero posto caeu na Escola Ximnasia Acordes e, en infantil, o campión foi o Pavillón.
A partir das 17:30 horas foi o turno para júnior e sénior. En total, participaron sete clubs nestas categorías, repetindo Ximnasia Pavillón, Maniotas, Acordes e Escola Ximnasia Acordes e coa incorporación da Escola Pavillón, Ximnasia Rítmica Compostela e María Barbeito.
En junior o Maniotas fíxose co ouro, cunha nota de 33,85 puntos. En segundo lugar estivo a Escola Ximnasia Acordes e, pechando o podio, a Escola Pavillón.
En sénior o podio estivo moito máis disputado e igualado. En terceiro lugar quedou a Escola Acordes, cunha nota de 30 puntos, grazas a unha moi boa actuación coa pelota. A prata foi para Acordes, con 37,65 puntos, sobresaíndo tamén no seu manexo da pelota. E, menos de dous puntos por enriba, o Ximnasia Pavillón logrou o ouro cunha nota de 39,15, proclamándose campión na casa.
Con estes resultados coñécense os clubs que formarán parte da Copa de España de conxuntos que se celebrará en xaneiro.
Éxitos dos conxuntos de Santiago na competición base
Ao día seguinte, o mesmo pavillón de Os Remedios acolleu a competición de base con categorías desde prebenxamín ata xuvenil desde as 10:30 da mañá ata as 13:30 horas.
Na primeira delas, prebenxamín, o Ximnasia Pavillón sumou outro ouro ao seu palmarés. Na seguinte, benxamín, o gañador foi a Escola Ximnasia Acordes, seguida de Ximnasia Rítmica Compostela. En alevín, o ouro foi para o club Viravolta de Santiago, e a prata para as súas veciñas, do Rítmica Compostela.
En infantil Viravolta repetiu primeira posición e, en cadete, o ouro chegou para o outro club compostelán.
Finalmente, en xuvenil, as pontevedresas do As Triscas B lideraron a clasificación. Con 19,35 puntos lograron o ouro, seguidas de preto por Escola Ximnasia Porta Norte e co Ximnasia Rítmica Compostela na terceira posición pechando o podio.
Ver esta publicación en Instagram
Os dous torneos realizáronse con normalidade entre as medidas de seguridade sanitaria por mor da pandemia. Só houbo que lamentar a falta do equipo alevín do Ximnasia Pavillón que, por estar confinado, non puido competir nesta edición.
A afección á Ximnasia Rítmica puido seguir o campionato na distancia ao ser transmitido dixitalmente a traves de streaming na web de Galician Sports. A competición celebrouse a porta pechada para aumentar a seguridade e evitar contaxios.
CAMPIONATO GALEGO RÍTMICA CONXUNTOS CONTROL COPA DE ESPAÑA CONXUNTOS