O regreso das Leonas7s á competición está máis preto, e Paula Requena volverá con elas. A xogadora do CRAT Residencia Rialta foi convocada por Pedro de Matías para a prelista de deportistas que prepararán o GPD Rugby Europe 7s Championship.
En total, 17 xogadoras adestarán para xogar o torneo que se celebrará en Lisboa do venres 4 ao domingo 6 de xuño. Cando finalicen as semifinais da Liga Iberdrola de rugby, nas que participan doce das convocadas, as Leonas7s participarán nunha rolda de adestramentos.
Na primeira fin de semana de xuño as españolas competirán no grupo C da competición portuguesa, contra Escocia e a propia Portugal. O grupo A está conformado por Rusia, Alemaña e Romanía, mentres que o B componse de Polonia, Bélxica e Gales.
A lista de Pedro de Matías inclúe a Requena e outras 16 xogadoras, que porén non conforman o grupo definitivo para o Europeo. A convocatoria coñecerase pouco antes de que o grupo poña rumbo a Lisboa. Aínda así, esta Selección non ten por que ser a mesma que competirá na segunda e última serie do Europe 7s Championship, prevista para o 26 e 27 de xuño en Moscú.
As convocadas das Leonas7s
A xogadora do CRAT, Paula Requena, estará acompañada por outra xogadoras veteranas como Amaia Erbina, Olivia Fresneda ou Ingrid Algar. Algunhas das novidades son as xogadoras menos experimentadas como Marta Cantabrana, Silvia Morales, Lea Ducher e a debutante Cecilia Huarte. Este é o listado completo:
- Marta Cantabrana – CR Majadahonda
- Ceciclia Huarte – CR Majadahonda
- Lucía Díaz – CR Majadahonda
- María García – CR Majadahonda
- Ingrid Algar – Sanse Scrum RC
- Beatriz Domínguez – Sanse Scrum RC
- Iciar Pozo – CR Cisneros
- Olivia Fresneda – CR Cisneros
- Inés Bueso-Inchausti – CR Cisneros
- María Calvo – CR Cisneros
- Silvia Morales – Olímpico de Pozuelo
- Eva Aguirre – Olímpico de Pozuelo
- Uribarri Battutieta – Eibar RT
- Amaia Erbina – Eibar RT
- Anne Fernández – Eibar RT
- Paula Requena – CRAT A Coruña
- Lea Ducher – UAS Universitario de Sevilla
