A galega Paula Otero está a participar desde este xoves 11 no Campionato de Europa Absoluto de natación en Roma. A nadadora do CN Arteixo acude como parte do equipo da Selección Española e participou xa nos 800 metros libre, onde logrou unha sexta posición na xeral e terceira na proba e con ela un billete á final.
A coruñesa nadou nesta primeira sesión xunto a Ángela Martínez, quen quedaría finalmente fóra da final. Otero rematou os 800 libres cun tempo de 8:36.27, polo que competirá hoxe venres ás 19:27 horas polas medallas. Todo un éxito xa no que é o seu debut nun Europeo absoluto.
A galega estará tamén nas competicións dos 400 e os 1500 libre.
Otero, parte do Equipo Nacional
A galega, e nadadora do CN Arteixo, foi convocada a Roma pola Selección Española, nun equipo formado por 22 nadadoras e nadadores. O Europeo Absoluto celébrase ata o 17 de agosto no Foro Italico – Mosaici Pool Stadio del Nuoto, con eliminatorias nas mañás e finais nas tardes. O evento poderá seguirse en Teledeporte e RTVE Play.
Antes desta competición, Otero estivo concentrada coa RFEN tres semanas en Serra Nevada, segundo informou o seu club. Alí, tras o Campionato de España de Sabadell, a galega puido adestrar en altura, despois dun ciclo de adestramento que lle serviu de base para afrontar esta competición internacional.
Esta é a terceira cita internacional da nadadora nesta tempada, e destaca como un dos novos nomes no relevo xeneracional da natación española.
