Dúas nadadoras galegas foron convocadas polo Equipo Nacional. Trátase de Paula Otero, do CN Arteixo, e Carla Carrón, do CN Arzúa, que se atopan con combinados estatais absoluto e júnior respectivamente.
A nadadora Paula Otero Fernández xa está en terras rusas. Un total de seis nadadoras e cinco nadadores representarán a España do 2 ó 7 de novembro de 2021 nos 21st Campionatos de Europa LEN KAZAN 2021 de piscina corta.
Tal e como informa o seu club, esta será unha cita de preparación para o Equipo Nacional absoluto que, no plano internacional e tras un esixente ano olímpico, ten posto o foco na tempada en piscina larga, na que se celebran os Campionatos do Mundo FINA en maio en Fukuoka, e os Campionatos de Europa LEN, en agosto en Roma.
Otero está recén chegada a este equipo absoluto despois dunha gran tempada de éxitos na categoría junior, e como tal este será para ela un campionato de grandes experiencias e aprendizaxes. A adestradora do CGTD, Luisa Domínguez, acompañará ó equipo nesta nova aventura na que Paula terá a oportunidade de darlle pistoletazo de saída na que será a súa primeira tempada nun novo grupo competitivo.
O calendario de probas de Paula Otero será o seguinte: martes día 2 nadará a proba de 800 libre, o xoves 1500 libre, sábado 200 libre, e rematará o domingo día 7 coa proba de 400 libre. O evento será retransmitido en directo en Teledeporte en horarios de 8:00 e 16:30.
Pola súa banda, Carla Carrón Muiña do C.N. Arzúa e bolseira do CGTD está convocada para participar co Equipo Nacional Júnior de natación nunha concentración de preparación xeral do grupo ESP-2024 que se celebra do 29 de outubro ao 6 de novembro no CAR de Sant Cugat (Barcelona).
