A cambresa Paula Medín é coñecida polo alcume de ‘Alevín’ no mundo do rugby onde é todo un nome propio na Coruña, en Galicia e en España. Fóra da cancha de xogo é fisioterapeuta. Sobre o tepe e cun balón na man Medín é unha leona, é dicir, defende a camiseta da Selección Española de rugby. Como internacional española no deporte do oval foi olímpica nos Xogos de Río 2016 e conqueriu un Campionato de Europa. Na competición doméstica, milita no CRAT Residencia Rialta da Coruña, conxunto co que gañou títulos como a Liga.
A.N.: O papel da muller no deporte e xa igualitario ou aínda queda?
Paula Medín: En xeral aínda estamos por detrás dos homes na maioría dos deportes, aínda que tamén é certo que nalgúns dominamos as mulleres. Os tradicionais estereotipos teñen moito que ver nisto, practicar certos deportes por ser home ou muller é algo que xa é case inusual vivilo. Estamos en época de cambios na conducta da sociedade, pero desgraciadamente sufrindo aínda as consecuencias do pasado.
Paula Medín, xogadora internacional de rugby: “Estamos en época de cambios na conducta da sociedade, pero desgraciadamente sufrindo aínda as consecuencias do pasado”
A.N.: Ao respecto da anterior pregunta, responde Galicia ao patrón estatal ou observas diferencias? En caso de ver diferencias, a situación galega sería mellor ou peor que a estatal?
Paula Medín: A verdade que neste sentido non vexo diferencias con outras comunidades.
A.N.: En que momento da túa vida tropezaches por vez primeira cunha discriminación por xénero no deporte? Que pasou?
Paula Medín: Nas World Series de Seven, celebradas en Dubai competíase masculino e feminino. As instalacións eran increíbles, había algo máis de dez campos de rugby pero un so estadio repleto de xente. Os homes xogaban todo no estadio e nós nos campos de fóra, puidendo xogar so no estadio se chegabas as semis ou a final. Evidentemente o que vendía era a competición dos homes, era o que daba diñeiro.
A.N.: Observas que por ser muller existen maiores dificultades para a práctica deportiva a niveis de competición?
Paula Medín: As dificultades que eu observo son sobre todo de escasez de xogadoras, cada día somos máis, pero aínda somos poucas polo que a veces a oferta é menor. Segundo en que deportes, tes que saír de España porque aquí as ligas aínda son de baixo nivel. Non existen case ligas profesionalizadas, costa máis conseguir patrocinios, e sen diñeiro non se pode crecer.
A.N.: Na túa opinión, hai límites ou teitos de cristal para o acceso da muller a diferentes postos no mundo do deporte á marxe do papel de deportistas (adestradoras, directivas, preparadoras físicas, etc)?
Paula Medín: Penso que non.
Paula Medín, xogadora internacional de rugby: “Sen diñeiro non se pode medrar”
A.N.: Con respecto a cando empezaches a túa vinculación co deporte, hai agora menos trabas? Houbo unha evolución positiva no tempo?
Paula Medín: A evolución foi exponencial. Dende o trato da federación cara a nós, patrocinios (actualmente Iberdrola como máximo patrocinador), maior numero de xogadoras federadas e a evolución do formato da liga. Antigamente so existían as ligas rexionais e o campión de cada liga xogaba en dous fines de semana a Copa da Raíña. Actualmente contamos con formatos de División de Honor A e B, con partidos de ida e volta e play off. Algo totalmente impensable nos meus inicios.
Paula Medín, xogadora internacional de rugby: “A evolución desde que eu empecei foi exponencial. Dende o trato da federación cara a nós, patrocinios, maior numero de xogadoras federadas e a evolución do formato da liga”
A.N.: Cales consideras que son os principais atrancos que ten hoxe unha muller para desenvolver unha carreira deportiva?
Paula Medín: A maternidade é o maior obstáculo dende o meu punto de vista. Pódese compaxinar e volver coa mesma condición física, pero o parón obrigatorio que tes que facer é unha desvantaxe moi grande respecto ós homes.
Paula Medín: “Só poden vivir do rugby a xogadoras con Becas ADO”
A.N.: Pódese vivir do deporte sendo muller?
Paula Medín: No noso caso só poden vivir delo a xogadoras con Becas ADO da disciplina de Rugby a 7 , é dicir xogadoras que están dentro do programa olímpico. En cambio xogadoras da selección de rugby 15 (que non é modalidade olímpica) non poderían vivir do rugby, nin tampouco as que xoguen a máxima categoría da Liga.
A.N.: Como limita a progresión ter que compaxinar a práctica deportiva con outro tipo de actividades profesionais?
Paula Medín: Sobre todo no tempo de descanso e recuperación. De maneira inevitable a calidade dos adestramentos baixan e o teu rendemento deportivo tamén.
Paula Medín, xogadora internacional de rugby: “Compaxinar deporte e outra profesión limita, sobre todo, no tempo de descanso e recuperación”
A.N.: Que mudarías do deporte actual para camiñar cara a unha igualdade plena?
Paula Medín: Daría difusión e visibilidade a todos os deportes por igual, tanto en categoría feminina como masculina.
A.N.: Hai quen avoga polo deporte mixto máis aló da base como unha posibilidade? Es partidaria?
Paula Medín: O deporte mixto non creo que sexa a solución.
A.N.: Cres que o deporte feminino está a vivir un momento doce?
Paula Medín: Sen lugar a dubida si. Os resultados aválannos.
A.N.: Ao fío desta última pregunta valora de 0-10 (sendo 10 o mellor) o momento actual do deporte feminino nestes ámbitos:
Paula Medín:
- Resultados deportivos _____________________ 9
- Visibilidade en xeral na sociedade _________ 6
- Repercusión mediática _____________________ 6
- Apoio de seareiros/as ______________________ 5
- Patrocinios _________________________________ 7
- Apoio das diferentes administracións ______ 7
