A futbolista deportivista Paula Gutiérrez manifestou após do triunfo das Nosas na XI edición do Trofeo Teresa Herrera Feminino que é un torneo que “sempre queremos gañar. Desde que eu cheguei é a primeira vez que gañamos sen chegar á quenda de penaltis. Era o obxectivo de todas, ademais de sumar bos minutos, boas accións, coller sensacións; pero sobre todo levarnos o trofeo”.
Preguntada sobre a súa posición no campo, xogou máis adiantada do habitual incluso chegando a posicións como a de Millene, a fútbolista do Dépor ABANCA Paula Gutiérrez manifestaba estar cómoda. “Xa falamos con Irene durante a semana que podería ter minutos aí. Non é a primeira vez que me toca xogar máis adiantada. Síntome moi cómoda. Xogar aí con Millene facilítame moito a chegada quedándome por detrás dela. Así que moi contenta”.
De cara a coñecer se ese debuxo no que Paula Gutiérrez estaría máis adiante no campo vai ser unha constante no Dépor ABANCA da tempada 2023-24, a futbolista deixou a decisión en mans da adestradora, Irene Ferreras. Declarou: “Estamos nas primeiras semanas. Se Irene quere que xogue máis adiantada, fareino. Estou predisposta. Se quere que xogue máis atrasada xunto a Ayaka, Henar ou a compañeira que sexa, tamén estou disposta. Donde decida poñerme aí estarei”.
“Eu estou aquí para sumar minutos. Todos os que sume serán benvidos”, apuntaba a deportivista Paula Gutiérrez.
Paula Gutiérrez: “Xogar en Riazor é unha pasada”
Sobre o escenario do partido, a futbolista do Dépor ABANCA manifestaba: “Xogar en Riazor é sempre unha pasada. Estamos encantadas de que se nos abran as portas. A afección nunca falla. Queremos agradecerlle á xente que se achegou, que sempre nos apoia e non nos deixa soas. Esperamos todas que non sexa a última vez que xoguemos en Riazor nesta tempada”.
Ás preguntas dos medios de comunicación na zona mixta do Estadio RIAZOR-ABANCA, Paula Gutiérrez asegura que “todas as novas xogadoras teñen moitísimo nivel, non fai falta que mencione a ninguén, veñen sumando, acollémolas da mellor maneira que podemos, o grupo está moi unido e hai moi bo ambiente”.
Preguntada polo bloque de futbolistas que se confeccionou para afrontar a tempada 2023-24, explicaba: “O proxecto do Dépor ABANCA foi darlle continuidade ao bloque de forte de futbolistas do ano pasado. Quedamos boas xogadoras e chegaron bos reforzos”.
