O EuroBasket está cada vez máis preto e o seleccionador Lucas Mondelo anunciou o terceiro descarte da convocatoria. A pivote galega Paula Ginzo non seguirá formando parte da Selección Española, pero si continuarán Raquel Carrera e Tamara Abalde.
O combinado español entra xa na fase final da preparación do torneo europeo con catorce xogadoras que seguirán traballando ata o comezo do mesmo, o 17 de xuño. Debido á actual pandemia de COVID-19, os dous últimos descartes da lista permanecerán xunto ao equipo en burbulla ata o día previo do inicio do EuroBasket. Esas dúas xogadoras incorporaranse á preparación dos Xogos Olímpicos unha vez remate a competición continental.
Mondelo agradece o traballo de Ginzo
Tras informar do descarte da galega Paula Ginzo, o adestrador Lucas Mondelo agradeceu á xogadora o seu traballo realizado nas tres semanas de preparación, afirmando que “Paula deu un paso adiante e está moi preto de quedarse na lista definitiva. Iso é bo, non só para ela, senón tamén para España, porque hai xente xove que está case preparada para dar o salto”.
As 14 elixidas
Finalmente, só catorce xogadoras continúan formando parte da Selección Española a menos de dúas semanas do EuroBasket que acolle Valencia entre o 17 e o 27 de xuño. A principal novidade é Astou Ndour, que se incorporou o pasado domingo, 6 de xuño.
- Maite Cazorla
- Cris Ouviña
- Silvia Domínguez
- Laia Palau
- Leo Rodríguez
- Alba Torrens
- Laura Quevedo
- Queralt Casas
- María Conde
- Laura Gil
- Raquel Carrera
- Tamara Abalde
- Nogaye Lo
- Astou Ndour
