- A laureada colocadora da Selección Española Patricia Aranda chega a Lugo para ser o cerebro do equipo de Pascual Saurín
- A nova xogadora do conxunto lucense foi MVP da liga francesa, a Copa da Raíña e está no Top 1000 de Volleybox
- Chega a Lugo despois de máis de dúas décadas na elite e xogar en España, Francia e Perú, ligas nas que foi designada mellor colocadora
- “Todos os cualificativos que podamos dicir dela quedarán curtos para definir a súa personalidade e calidade dentro do campo”, sinala o técnico Pascual Saurín
O CV Arenal Emevé xa ten á súa xoia da coroa: Patricia Aranda. A colocadora chega ao equipo lucense para ser o cerebro do bloque de xogadoras que adestrará este curso Pascual Saurín.
A laureada colocadora da Selección Española súmase ao técnico do combinado nacional para disputar a liga
Iberdrola nas filas das Loitadoras. O propio Saurín deixa claro que o seu equipo virará ao redor da granadina: “Patricia Aranda vai ser a pedra angular deste proxecto, falamos dunha xogadora de contrastada calidade”, afirma o técnico de Albanilla.
Patricia Aranda recala no club lucense despois de máis de dúas décadas na elite do voleibol nas que deu mostras do seu talento en países como España, Francia e Perú. Nos campionatos de todos eles acabou levándose o galardón de mellor colocadora, ademais do recoñecemento de público e rivais. Tamén foi designada MVP dunha liga tan esixente como a gala e da Copa da Raíña que o CV Haris gañou hai dúas tempadas no Municipal de Lugo.
A nivel colectivo o seu palmarés conta cunha Liga Iberdrola, tres Copas da Raíña, dúas Supercopas de España e segundos postos na Challenge Cup, a liga francesa e a liga peruana.
Ver esta publicación en Instagram
A dimensión de Patricia Aranda no vóley mundial sitúaa no Top 1000 de todos os tempos do portal Volleybox, un mérito que só comparten outras sete xogadoras españolas na historia: Susana Rodríguez, Goya Dorta, Diana Castaño, Marisa Fernández, Romina Lambas, Esther López e Helia González. Algo que corrobora o que vai ser o seu adestrador: “Todos os cualificativos que podamos dicir dela quedarán curtos para definir a súa personalidade e calidade dentro do campo”.
Saurín tamén celebra a chegada de Patricia Aranda porque “vai ser un referente para o equipo. É unha sorte poder contar con ela e que as mozas poidan crecer á beira dunha xogadora na que verse reflectidas”. O preparador das Loitadoras cualifícaa tamén como “unha xogadora que non é simplemente unha colocadora boa, senón que ademais ten unha mentalidade moi competitiva e iso vaillo a inculcar ao equipo”.
Así, o actual seleccionador nacional apunta que “probablemente ese sexa o salto de calidade que necesita o Arenal Emevé para dar un pasito máis e estar nas posicións de arriba. Asegurámonos a loita e que imos estar
pelexando cada partido e cada punto do campionato”.
A chegada de Patricia Aranda é a sétima ficha confirmada no CV Arenal Emevé logo das de Lucía Prol, Carolina Camino, Karyna Malachias, Ainara Burgo, Lida Figueira e Alejandra Pérez.
