Patri Romaní constitúe un reforzo de luxo no Viaxes Amarelle FSF de cara aesta segunda fase da Primeira División do fútbol sala Feminino da RFEF na que as coruñesas se xogan a permanencia na elite.
Patri Romaní Vilela (Muxía, 04/11/1991) convértese na segunda incorporación para a segunda fase da competición da Primeira RFEF Futsal Feminina no Viaxes Amarelle FSF.
A xogadora muxiá non puidera formar parte do primeiro bloque do Viaxes Amarelle ao 100%, debido a motivos laborais.
Pero agora incorpórase á disciplina do primeiro equipo que adestra Jorge Basanta para aportar o seu fútbol nesta segunda fase da competición. Romaní sumará o seu xogo ao resto do equipo, para xuntas loitar pola permanencia do bloque na máxima categoría do futsal feminino español.
A pesar de que Patri Romaní, formalizou a súa licenza ao principio de tempada co resto de xogadoras do club, motivos laborais impediron que puidese ter continuidade nos adestramentos, e de feito só puido participar no partido aprazado contra Ourense Envialia FSF o pasado mes de decembro.
Cambios nas súas condicións laborais, propiciaron que este mesmo xoves incorpórese de novo aos adestramentos co resto de grupo, e facéndoo de forma normal e continúa. Deste xeito, o técnico do conxunto coruñés, Jorge Basanta, poderá dispor dela para esta segunda e decisiva fase da competición nacional.
Esta será a sétima tempada consecutiva no primeiro equipo do Viaxes Amarelle FSF para a futbolista de Muxía. Nas últimas tempadas Patri Romaní sempre foi unha xogadora clave nas aspiracións do club. Aportou no día a día, tanto no deportivo como no grupal. De feito, nas últimas tempadas era a primeira capitá do conxunto galego.
Patri Romaní aportará experiencia
Con 29 anos Patri Romaní Vilela será unha das xogadoras con máis experiencia na categoría e poderá achegar ese punto de tranquilidade e calma, que axudará ao resto do equipo nas súas aspiracións nesta tempada tan atípica, e marcada pola crise sanitaria, provocada polo COVID-19.
Desde o club Viaxes Amarelle FSF queren “agradecer o compromiso e a confianza de Patri Romaní por volver dedicarse plenamente ao equipo, asumindo o reto de seguir crecendo para conseguir o obxectivo da permanencia na Primeira RFEF Futsal Feminina”.
O regreso de Patri Romaní á disciplina laranxa súmase á fichaxe da futbolista arxentina Sofía Florentín Tana anunciado hai uns días. Trátase dunha xogadora internacional coa Selección Arxentina de Fútbol Sala.
