O Dépor ABANCA comezou con bo pé a nova tempada, sumando tres puntos ante o Barça B. Neste encontro, a canteirana Patri López foi titular, e tras sumar a primeira vitoria a xogadora asegura que “teño moitas ganas e ilusión de conseguir os obxectivos que nos marcamos desde o primeiro día”.
Agora, neste novo equipo branquiazul, a galega é unha das capitás e foi titular no primeiro encontro, algo que conseguiu “a base de moito esforzo e trablallo e grazas a Manu Sánchez e a Pablo e neste caso a Miguel Llorente e o seu corpo técnico que me están dando a confianza que preciso para dar a mellor versión de min”.
Patri López: “É un orgullo poder ser capitá dun equipo como o Dépor”
Sobre a súa oportunidade de levar o brazalete de capitá, a xogadora confesa que “é un orgullo poder ser capitá dun equipo como o Dépor. Cheguei no 2016, na súa primeira tempada, e aínda que logo fun cedida ao Friol, ao final o Dépor é o club no que empecei a xogar de maneira máis profesional. Despois de tantas tempadas é satisfactorio ver que o teu traballo ten recompensa”.
Confianza no equipo
Neste debut en Reto Iberdrola, a futbolista afirma que “sempre é bonito empezar con vitoria e anímate a ir a pola seguinte. Creo que estamos adestrando moi ben estas semanas, non só estas senón tamén as de pretempada, e temos moitas ganas de que chegue a fin de semana para conseguir outra vitoria e seguir no bo camiño”.
O seguinte reto será o Seagull, un equipo que en palabras de Patri López é “moi competitivo e iso vai provocar que sexa un partido moi igualado. Intentaremos saír a gañar, xogar ao que sabemos e levarnos os 3 puntos”. Porén, será o primeiro desafío para as coruñesas nun campo fóra da casa que, ademais, é de céspede artificial, algo ao que non están acostumadas as deportivistas.
Patri López ten claro que o contrincante “aproveita os erros do rival, polo que intentaremos non concederlles moito, pero non imos basear o noso xogo no que elas van facer, senón que intentaremos saír xogar como sabemos”.
Vitoria ante as culés
Sobre o partido da pasada fin de semana, a capitá asegura que sabían que “ía ser un partido complicado. Ao final é o Barça, un equipo ao que lle gusta ter a pelota e ser o dominador do partido. Penso que conseguimos facer as cousas ben. Quitarlle posesión a un equipo como o Barça é complicado e conseguimos facelo”.
Admite que xogaron de maneira vertical, pero considera que cos goles en balón parado sobrepuxéronse aos erros, típicos dos primeiros partidos, e aínda hai marxe de mellora: “Aínda temos tempada por diante para corrixir”.
Novidades no Dépor ABANCA
Malia a restruturación que tivo que vivir o Dépor ABANCA nesta campaña, Patri López explica que foi unha “renovación, non necesaria, pero si obrigada polo feito de que moitas xogadoras tiveron ofertas para quedar na Primeira División e demostrar o seu talento”. A galega acórdase de excompañeiras como Athenea, Gabri ou Iris, á vez que asegura que “este ano están a facerse as cousas ben, somos un plantel con moito futuro porque a maioría somos xogadoras xoves e creo que a incorporación ao proxecto de Miguel e o seu corpo técnico como Ana axuda a que o ambiente sexa moi agradable, moi cómodo, creo que todos nos sentimos moi ben na Coruña e no Dépor e iso nótase no campo”.
Patri López: “Volvemos ás nosas orixes, ter o balón, ser as dominadoras do partido e creo que o estamos empezando a facer bastante ben”
Entre as novidades tamén está o estilo de xogo. “Volvemos ás nosas orixes, ter o balón, ser as dominadoras do partido e creo que o estamos empezando a facer bastante ben e como el quere. Eu como lateral é certo que nos dá maior liberadade para incorporarnos por dentro e cada xogadora ten o poder de decisión para facer o que ela cre máis convinte para o equipo e non estar ancorada nunha posición fixa. Que as xogadoras teñamos liberadae axudanos a ter confianza e xogar máis tranquilas e ao final iso sempre axuda ao equipo”, explica.
