No vestiario do Dépor ABANCA hai ganas de loitar á seguinte batalla. “Temos moitas ganas de que chegue o mércores”, dicía en rolda de prensa unha das capitás do conxunto branquiazul, Patri López. A futbolista galega engadía a preguntas dos medios: “Queremos romper esta mala serie de resultados que estamos a ter. Vimos dun partido que nos esixiu bastante pero estamos preparadas. A semana de descanso traballamos moi duro. Estamos preparadas e con moitas ganas”.
O vindeiro mércores visitará a Cidade Deportiva de Abegondo o Sporting Huelva. O partido está fixado para as 18:30 horas, poderá ter público e será transmitido por Vamos. Trátase dun partido da 17ª xornada da Primera Iberdrola.
Abegondo volve abrir as súas portas para ver As Nosas aínda que só a 150 persoas
Patri López estivo de novo no once titular o pasado domingo ante o Rayo Vallecano. A futbolista coruñesa asegura que “volver xogar sempre é ilusionante. Sempre tes ganas de achegar o máximo posible ao equipo”.
Patri López: “Temos que seguir traballando e correxindo erros”
Laméntase a deportista galega dos tres tantos recibidos polo conxunto deportivista o pasado domingo na Ciudad Deportiva Fundación Rayo Vallecano: “Encaixar goles non lle gusta a ninguén pero temos que seguir traballando, corrixindo os erros. Esperemos que nos próximos partidos encaixemos menos”.
Do mesmo xeito que o facía hai uns días o adestrador do Dépor ABANCA, Manu Sánchez, a súa pupila, Patri López, tamén relativiza a transcendencia do partido ante as andaluzas: “Temos que saír a gañar pero como con calquera outro. Quedan bastantes partidos desta segunda volta. Como dixo o míster na rolda de prensa anterior, estamos nunha estación na que pasan trens. Aínda que perdamos este partido, que esperemos que non, pasarán máis trens e tentaremos ir gañando os máximos partidos posibles. Non é a vida ou morte”, conclúe.
Agardan un Huelva “con moitas ganas de gañar, pero nós tamén as temos”
Cre a polivalente futbolista do RC Deportivo ABANCA que o Sporting Huelva “chegará con moitas ganas, como nós. Perder no último minuto (como lles ocorreu ás onubenses no último partido ante o Levante UD) doe e queda aí como algo cravado. Pero nós tamén temos moitas ganas de gañar. Aínda que non perdemos no último minuto, tamén nos doeu moitísimo a derrota ante o Rayo Vallecano. Os dous equipos iremos a por o partido pero espero que o tres puntos queden en Abegondo”.
