A canaria Patri Cabrera, xogadora do BAXI Ferrol, xa mirá máis aló da súa carreira como xogadora e estase a preparar para ser técnica. A baloncestista está a realizar o Curso de Adestrador Superior 20/21.
Segundo recolle a FEB nunha entrevista á oito do BAXI, os seus primeiros pasos dirxindo un banco foron froito da casualidade. O club precisaba axuda no equipo preinfantil e a propia Cabrera ofreceuse. A canaria seguiu co equipo nas seguintes tempadas ata a categoría cadete.
Na mesma entrevista, a xogadora recorda a vez que tivo que facerse cargo do equipo sénior, xa que Sandra Prieto, a adestradora habitual, tivo que se poñer á fronte do primeiro equipo. Cabrera recorda as súas dúbidas, ao ter que dar ordes a xogadoras mesmo maiores que ela, pero o balance final foi moi positivo grazas á implicación do grupo. Nesta tempada compaxinou a este mesmo grupo cun de premini, á vez que acadou o ascenso co primeiro equipo á LF Endesa.
Sobre a consecución do soñado ascenso, Cabrera recoñeceu a tensión que sufriu nos últimos partidos e subliñou o esforzo necesario para chegar aí: “Non só conseguimos o ascenso, senón que gañamos 29 partidos seguidos. Semella doado, pero custounos moitas horas de adestramento, de ximnasio e de scouting. Estou moi feliz de ter participado en devolver ao equipo á liga na que se merece estar, agora só hai que aproveitalo e traballar moi duro para permanecer moitos anos en LF Endesa“.
Patri Cabrera: “Agora só hai que aproveitalo e traballar moi duro para permanecer moitos anos en LF Endesa”
As claves de Cabrera como adestradora
Para a baloncestista do BAXI Ferrol, unha das mellores desde a liña de tres, transmitir a importancia de dominar o tiro desde esta distancia é cada vez máis importante. “Se non tes un bo porcentaxe de tres, estarás limitando o teu xogo, o baloncesto cada vez pide máis rango de tiro en todas as xogadoras porque se non as defensas condicionan moito”, explica á FEB. Para logralo, Cabrera incide na importancia de que as xogadoras compitan con confianza e a canaria sírvese das súas experiencias para iso.
Patri Cabrera: “Se non tes un bo porcentaxe de tres, estarás limitando o teu xogo, o baloncesto cada vez pide máis rango de tiro”
A longo prazo, o máis importante para a canaria é seguir “con estas ganas de ser mellor cada día e ser capaz de trasladar ás xogadoras o que necesitan. Quero ser unha adestradora humilde e que fale de min o meu traballo, non os logros”, responde.
O futuro da 8 do BAXI
Participando no Curso de Adestrador Superior, a xogadora pretende “coñecer outros puntos de vista e desfrutar da parte presencial na que estarei dez dáis con moitos adestradores de diferentes clubs e comunidades autónomas”. Coa vista posta no futuro, Cabrera quere chegar á elite como adestradora, pero é consciente da dificultade de lograr este obxectivo.
Polo de agora, non é o máis habitual ver a unha muller ao mando do banco dos grandes clubs, pero a canaria considera que “as adestradoras teñen cada vez máis oportunidades e creo que están demostrando a súa valía”.
Como referentes, Cabrera non cita a ningún nome en concreto, pero confesa que “me quedo con cousas de todos os técnicos que tiven, todos son referentes e grazas a eles sei o tipo de adestradora que quero ser. Os que máis me marcaron son os que foron humildes e os que se comprometeron co plantel. En España somos uns privilexiados porque o nivel dos técnicos é alto, por coñecementos e por valores”.
O adestrador co que compite actualmente Cabrera, Lino López, seguirá na próxima tempada coas ferrolás, asumindo o reto de permanecer na LF Endesa, na volta do equipo galego á máxima categoría.