O HC Borbolla empeza cun paso adiante e firme a segunda fase da competición na Ok Liga Feminina. As galegas venceron ao Igualada Feminí HCP por un rotundo marcador de 4-1. Este resultado permitiulles escalar postos na táboa clasificatoria até colocarse actualmente na quinta praza con nove puntos no seu haber.
Deste xeito o HC Borbolla está un chisco máis preto dos tres primeiros postos que teñen como premio a salvación. De feito, as galegas están, exactamente a un único punto de respirar con maior acougo entre ese trío de equipos elixidos para seguir na elite estatal.
Pero aínda queda moito traballo por diante. De feito, no arranque deste partido, e pese ao resultado final, as coruñesas non o tiveron doado. Non foi até a segunda parte que o equipo que adestra Santi Martínez foi quen de poñer terra de por medio co Igualada Feminí HCP no marcador electrónico do pavillón polideportivo de Monte Alto (A Coruña).
Ao final da primeira metade vencían, si, pero pola mínima froito dun gol de Lara Yáñez. Eso si, a xogadora do conxunto galego anotaba cando se levaban consumidos unicamente dous minutos de xogo. Deixaban así as tomatitas a súa pegada ofensiva nada máis comezar o partido. Pero como deciamos previamente, este triunfo non foi chegar e enchar. Logo dese gol, chegaron os minutos de seca goleadora.
Os goles, de a dous
Xa na segunda metade as coruñesas anotaban. E o facía de novo Lara Yáñez. E como os goles neste partido semellaban ir de dous en dous, como o famoso postre, a chilena Fernanda Muñoz tamén anotaba por duplicado colocando o 4-0 no luminoso. O cuarto tanto foi transformando unha falta directa. Co 3-0 Raquel Bernadas Porto desperdiciaba unha falta directa a favor do Igualada Feminí HCP.
Co partido encauzado, o HC Borbolla confiou máis no seu xogo e a presión quedou toda no vando do Igualada. O gol da honrra das catalanas acadouno Clara Claramunt a falta dun minuto para que soase a bucina en Monte Alto.
Nesta primeira xeira da segunda fase, no grupo pola permanencia venceron o CP Vilanova (1-6 ao Cuencas Mineras), o Vila-Sana (1-4 ao CP Alcorcón) polo que segue liderando a clasificación, e o HC Borbolla (4-1 ao Igualada Feminí HCP). Aprazouse o Garatge Plana Girona CH contra o Areces Ecopilas Asturhockey.
Na vindeira xornada as de Santi Martínez terán, xustamente, que medir forzas co CP Esneca Vila-Sana, o único conxunto que presenta unha tarxeta que fai pensar en que so un portento evitaría a súa salvación. Son líderes con 21 puntos, a 11 dos postos de descenso. Así que as galegas teñen enfrontarse, na segunda xornada, ao oso máis duro de roer desta fase. Será o sábado 20 de febreiro en terras catalás as 20:00 horas.
FICHA TÉCNICA
HC BORBOLLA: Edén Avecilla, Julia Cabanas, Lara Yáñez, Fernanda Muñoz e Lucía Yáñez – quinteto inicial -. Tamén xogaron: Antía Rivadas, Alba Díaz, Marta Vilas e Beatriz Pereira. Florencia de Giorolamo (P.S.)
IGUALADA FEMINÍ HCP: Mónica Ferrer, Elba GArreta, Laia Cid, Raquel Bernadas e Carla Claramut – quinteto inicial -. Tamén xogaron: Cristina Riba, Mar Franci e Queralt Del Águila.
GOLES: 1-0: Lara Yáñez. 2-0: Lara Yáñez. 3-0: Fernanda Muñoz. 4-0: Fernanda Muñoz (Falta directa). 4-1: Carla Claramut Casals (penalti).
ÁRBITROS: Colexiados Lorenzo Bosch Sande e Diego Garrido Areas. Amosaron cartón azul a Lara Yáñez e Fernanda Muñoz polas locais e a Carla Claramunto polas igualadinas.
INCIDENCIAS: Partido correspondente á primeira xornada do Grupo D ( do 9º ao 16º equipos clasificados ) da Ok Liga. Este grupo inclúe aos equipos que loitan pola permanencia conseguindo a salvación só os tres primeiros. O partido celebrouse a porta pechada no pavillón de Monte Alto na Coruña. A normativa autonómica vixente en Galicia para a prevención do contaxio da COVID-19 impide que os espectáculso deportivos conten con público nas bancadas.