Esta fin de semana ningún conxunto galego de Primera División Femenina de voleibol descansará. Os tres equipos teñen importantes retos por diante este sábado e domingo, co peche da primeira volta achegándose.
O CV Bruxas xoga contra o terceiro clasificado; o Calasancias Coruña visita ao CD Voleibol Astilleto, un rival da súa liga; e o Aceites Abril CVO quere sumar para facerse coa primeira posición.
As galegas do Aceites Abril queren ser líderes
O cadro ourensán será o que abrirá a xornada para as galegas. O sábado, ás 17:00 horas, enfrontarase ao CV Oviedo, líder invicto da categoría. As xogadoras do Aceites Abril deberán dalo todo na pista se queren sorprender ás asturianas e arrebatarlles a primeira posición.
Ambos conxuntos atópanse a un punto de distancia, e as ourensás chegan con moita enerxía despois de levarse o derbi ante o CV Bruxas. As súas seguintes rivais veñen dunha xornada de descanso, e con dous partidos por debaixo, que deberán recuperar nas próximas semanas. O encontro celebrarase a porta pechada pero poderá seguirse polas redes das galegas no espazo en Facebook: @voleyourense.
Bruxas e Calasancias buscan chegar á metade da táboa
Tamén contra asturianas e tamén o sábado 12 de decembro, pero ás 19:30 horas, xogará o Bruxas. As amienses teñen un duro partido por diante, contra o terceiro clasificado, o Curtidora Universidad de Oviedo. Dez puntos separan a ambos conxuntos, aínda que as galegas teñen dous partidos menos xogados.
Se vencen, será unha boa oportunidade para volver a situarse na metade da táboa e abandonar a parte baixa. Despois da derrota do derbi galego, as xogadoras do Bruxas precisan unha vitoria que lles levante os ánimos.
Por último, o domingo 13 de decembro, ás 11:30 horas, será o turno do Calasancias Coruña. Esta será unha cita moi importante para as galegas, que visitan a un rival directo, o CD Voleibol Astillero, cun punto menos e unha posición por debaixo delas.
Cunha vitoria, as xogadoras do Calasancias poden ascender moito na clasificación e deixar atrás a zona de descenso. Os números están ao seu favor; con menos sets a favor que as súas rivais, as galegas atópanse por riba delas. O Astillero, malia puntuar moito, tamén recibe moitos tantos, algo que as coruñesas tentarán asinar.
