Chegou unha das xornadas cruciais para o Dépor ABANCA no calendario da Primera Federación FutFem da RFEF. As galegas visitan a cancha da SD Eibar. En Unbe o conxunto que adestra Irene Ferreras xógase moitas das súas aspiracións ao ascenso directo á elite do fútbol feminino estatal. O partido está fixado para hoxe, dominto 5 de febreiro, a partir das 12:00 horas e corresponde á 19ª xornada.
Na primeira volta, disputada o pasado 29 de outubro en Abegondo, o choque, moi equilibrado e disputado, acabou en empate (1-1). Este encontro decidirá o golaverage particular e, se cadra, o posto final na táboa, ese que dá o non o ascenso directo.
As Nosas do Dépor ABANCA son líderes en solitario
Os resultados do pasado mércores na liga na Primera Federación FutFem da RFEF, co traballado triunfo deportivista en Abegondo (2-1) ante o Athletic Club B incluído, levantaron ás Nosas ao liderado en solitario da categoría con 37 puntos, por diante do CP Cacereño (2º con 35 puntos) e do FC Barcelona B e tamén do seu rival de hoxe, a SD Eibar (3º e 4º respectivamente con 34 puntos).
Nas ausencias Irene Ferreras non poderá contar con Samara e Aroa Guerra, ambas as dúas continúan lesionadas. No caso da coruñesa, estaría case recuperada pero aínda non como para xogar.
Mantense na convocatoria a canteirana Paula Monteagudo, asentada no lateral zurdo. A lista facilitada pola adestradora conta con 18 futbolistas.
#AsNosas convocadas para a 19ª xornada de #PrimeraFederaciónFutFem, o #EibarDéporABANCA de mañá ás 12:00 h. no Complejo Deportivo Unbe! pic.twitter.com/X9BUQxKyr6
— RC Deportivo (@RCDeportivo) February 4, 2023
Sobre a cancha na que se vai xogar, Irene Ferreras declaraba na previa: “é un escenario ao que nós non estamos tan afeitas, pero estamos a tentar deixar atrás todas esas cousas, todas esas dificultades. Na adaptación de diferentes terreos de xogos, imos crecendo e imos madurando no que toca facer en cada momento. Non en todos os campos pódese xogar da mesma forma. O que temos en claro é que aquí o que importa ou o que temos que tentar é gañar máis aló de se sentímonos máis ou menos cómodas. Iso o equipo está a entendelo ben e estámonos adaptando ben”.
A SD Eibar vén de perder co Osasuna
Pola súa banda, o SD Eibar caeu o pasado mércores en Unbe ante o CDF Osasuna Femenino (0-1), marcador que nunha categoría tan igualada relegouno á 4ª praza.
No seu campo, as eibarresas gañaron ao Rayo Vallecano (2-0), Athletic Club B (3-1), FC Barcelona B (2-0) e Real Oviedo (1-0); empataron co CD Juan Grande Ginelux (0-0), Granada CF (1-1) e DUX Logroño (1-1); e caeron ante o SE AEM (0-1) e o citado choque fronte ás osasunistas esta mesma semana.
Irene Ferreras: “Temos un partido moi difícil diante”
A adestradora do Dépor ABANCA, Irene Ferreras, explicaba na rolda de prensa previa ao partido contra da SD Eibar, e xa co equipo líder da categoría que era consciente do momento para o bo e para o malo. “Estamos nunha situación agora privilexiada que temos que gozar, pero con tranquilidade. Tampouco nos imos a extremos. Sabemos que agora temos un partido moi difícil por diante e queremos darlle continuidade a isto”, explicaba con ilusión pero cos pés na terra.
Os resultados das rivais beneficiaron ás deportivistas na xornada disputada entre semana. Nese sentido Irene Ferreras explicaba: “Imos afrontar este momento como unha oportunidade de dar ese golpe na mesa se podemos, pero sabendo que logo, tanto salga ben como salga mal, imos ter que seguir traballando moitísimo porque hai igualdade máxima e en dúas xornadas cambia a película moitísimo”.
A intención da adestradora deportivista de cara ao partido a disputar hoxe nas instalacións eibarresas de Unbe eran: “Tentar facer un partido serio. Imos tentar evidentemente ir a polos 3 puntos, pero facendo un partido un pouquiño mellor do que o fixemos aquí e tentando ter garantías de poder competir ben”.