O conxunto galego do Viaxes Amarelle FSF, dirixido por Jorge Basanta, ten este sábado un dos partidos máis importantes da primeira fase da competición na Primeira División de futsal. As coruñesas xogarán a 16ª xornada visitando a un rival directo, o Gran Canaria FSF Teldeportivo, a partir das 15:30 horas (16:30 horas na península).
O contrincante das herculinas este sábado atópase tamén na loita directa pola permanencia na competición, ocupando actualmente a última posición do subgrupo A. As canarias suman 20 goles a favor e 47 tantos en contra, nos 12 encontros disputados esta tempada. En total, as que actuarán como locais só foron quen de sumar unha vitoria e un empate, fronte a dez derrotas.
Precisamente, esa solitaria vitoria foi acadada na última xornada, ante as tamén galegas do Cidade de As Burgas, cun resultado final de 2-4.
Pola súa parte, o Amarelle FSF chega dunha dura e contundente derrota ante o STV Roldán na súa casa. As de Basanta non foron quen de controlar ao rival, que finalizou o partido cun 5-0 a favor.
Malia a derrota, as coruñesas manteñen a sétima posición, onde están con sete puntos en 12 duelos disputados. Un punto máis que as ourensás do Cidade e tres máis que as canarias do Teldeportivo.
Cita clave para o Amarelle
O equipo da Coruña afronta este partido como vital na loita por manter a categoría e poder manter o gol average tras a vitoria conseguida na primeira volta.
Para este segundo enfrontamento, o Amarelle convoca a oito xogadoras de pista e tres porteiras:
- Sandra Rodríguez
- Tami Gándara
- Leti Rojo
- Anna Escribano
- Laura Doce
- Candela Soria
- Cris Lourés
- Patri Corral
- María Gómez
- Yaiza Otero
- Sofía Rodríguez
Dentro desta convocatoria, Lourés é dúbida ata o último momento. A xogadora está entre algodóns ao non poder adestrar con normalidade ao longo da semana por molestias arrastradas desde o duelo ante o Roldán.