Unha vez máis, o COVID-19 castiga ao deporte galego. Desta vez, tocóulle a parte do plantel do Pontevedra Rugby Club, que deberá pasar unha corentena tras ser contacto estreito dun caso positivo en coronavirus.
A pasada fin de semana, as Irmandiñas viaxaban a Cataluña para enfrontarse ao GE i EG no marco da segunda xornada da División de Honor B de rugby. Ao día seguinte do partido, o club catalán informou do positivo dunha das súas xogadoras, que competiu no duelo.
Ao coñecer este dato, o plantel do Pontevedra RC, así como o staff técnico que se desprazou a Girona, activou os protocolos establecidos en Galicia para estes casos. As 23 xogadoras e o corpo técnico permanecerán en corentena ata o 27 de xaneiro.
Polo de agora, ningunha das persoas illadas mostrou síntomas da enfermidade, e este xoves, 21 de xaneiro, están citadas para realizar as correspondentes probas PCR.
O partido do Pontevedra RC ante o Sant Cugat, aprazado
Ante esta situación, o equipo das Irmandiñas solicitou o adiamento da seguinte xornada, prevista para o domingo, 24 de xaneiro, ás 11:30 horas ante o Sant Cugat en Barcelona.
A Federación Española de Rugby xa aprobou o aprazamento deste encontro, polo que queda pendente saber a nova data do duelo. Desde o Pontevedra RC pídenlle disculpas ao club catalán polas molestias ocasionadas e declaran que “esperamos que pronto podamos visitalas”.
