Hai case unha semana o Pescados Rubén Burela FS anunciaba que debido a un caso positivo en COVID-19 no plantel, parte do equipo que estivo en contacto directo foi confinado. Seis días despois desta noticia, o club laranxa confirma que parte do equipo deberá seguir en illamento ao confirmar dous positivos máis no conxunto.
Estes novos casos confirmáronse nos segundos resultados de PCR realizados aos contactos estreitos da xogadora que deu positivo hai dúas semanas, unha vez cumprido o período de illamento domiciliario.
Volta paulatina aos adestramentos do Burela
Segundo informan desde o club da Mariña, o equipo está seguindo os protocolos sanitarios, polos cales parte das Guerreiras Laranxas puideron retomar os adestramentos o mércores pasado. Esta semana poderá sumarse algunha futbolista máis, pero aínda deberán esperar algúns días para que o conxunto ao completo volva á pista.
A xornada 12 da Primeira División de Fútbol Sala, prevista para este sábado, 30 de xaneiro, en Vista Alegre coa visita de Móstoles FSF, quedará supeditada á resolución do xuíz de competición da Real Federación Española de Fútbol (RFEF).
A día de hoxe, todos os clubs galegos da máxima categoría do futsal español, agás o Cidade de As Burgas, están en parte confinados por ter casos de COVID-19 nas súas filas. O último deles en anuncialo foi o Viaxes Amarelle.
