O CRAT Residencia Rialta ven de gañar ao INEF L’Hospitalet por un marcador de 38-0. O triunfo non supuxo para as herculinas subir postos na táboa clasificatoria. Seguen quintas, a un chanzo dese Top4 que da opción a xogar o play-off polo título. Esa é a primeira meta esta tempada para este grupo de xogadoras que adestra a dupla conformada por Rogelio Sabio e Jos Portos.
Afrontan agora unha semana de parón competitivo xusto antes de xogarse o todo polo todo cos cruces que as medirán aos conxuntos do Sanse Scrum RC e o C.R. Olímpico de Pozuelo. Serán partidos contra rivais directos e polo tanto, enfrontamentos cruciais.
Jos Portos valoraba o triunfo desta fin de semana contra o conxunto catalán explicando: “Para nós foi importante esta victoria”. Restáballe importancia o técnico ao feito de non escalar postos na clasificación dado que xusto se aproximan cruces que podería poñer solución a esa situación.
Explicaba Jos Portos que se deron “os resultados previstos. Contábamos con eles. Péchase todo un pouquiño máis. As Cocos de Sevilla (en referencia Corteva Cocos Rugby andaluz conocidas como as crocodilas) están no primeiro posto e agora veñen cruces entre rivais directos. De aí vaise descartar un”, prognostica o adestrador.
Jos Portos, adestrador: “agora veñen cruces entre rivais directos. De aí vaise descartar un”
A baixa por sanción de Kate, un reto
De cara precisamente a esos partidos decisivos, o CRAT Residencia Rialta perderá a unha xogadora importante dentro do grupo: Kate Matau que viu cartón vermello no último partido contra INEF L’Hospitalet. As previsións do corpo técnico é que o bloque perderá a participación desta xogadora, se cadra, por tres xornadas. “Estamos pendentes do comité de competición, pero seguramente sexan tres partidos”, explicaba Jos Portos.
Jos Portos, adestrador sobre a previsible sanción a Kate Matau: “Estamos pendentes do comité de competición, pero seguramente sexan tres partidos”
O técnico advertía que esta circunstancia servirá precisamente para amostar o xogo de equipo máis aínda. “É o momento de que demostremos que somos un equipo e que non dependemos dunha xogadora. Se no rugby alardeamos do colectivo, do equipo… pois é o momento. Somos un equipo. A ver se o conseguimos”, sinalaba o adestrador das coruñesas.
Semana para cargar pilas para o CRAT
De cara ao traballo semanal das xogadoras do CRAT, Jos Portos apuntaba, preguntado por As Nosas: “esta semana non hai partidos así que será para cargar pilas e recuperar un pouquiño. E a que ven recibimos ao Sanse na Coruña. Cos enfrontamentos que hai, se conseguimos gañar, poderíamos poñernos de terceiras. Imaxina o salto! E se perdemos, complícase moitísimo entrar en play-off”.
Na fin de semana do 16 de febreiro o CRAT Residencia Rialta recibirá ao Sanse Scrum RC en Elviña (terceiras na táboa). E a seguinte xornada, a disputarse a fin de semana do 23 de febreiro, viaxará a xogar á cancha do Valle de las Cañas para medir forzas con C.R. Olímpico de Pozuelo (sextas na clasificación). Trátase de dous enfrontamentos cruciais para determinar o futuro do equipo nesta tempada.
MIRA O ÚLTIMO PARTIDO DO CRAT NA CANLE GALICIANS SPORTS
