Este verán a palabra paripé estivo en boca do deportivismo. Foi a escollida por Álex Bergantiños para definir no seu momento o partido aprazado da última xornada de liga ante o Fuenlabrada e, de xeito acertado, o club utilizouna para referirse a ese encontro nos seus comunicados. Agora semella que estamos a vivir un novo paripé coa non convocatoria de Ainize Barea ‘Peke’ coa Selección Española despois de estrearse como internacional na pasada citación.
Podería ser unha situación cotiá no fútbol, podería ter que ver con estados de forma, lesións… Podería, si, pero permitídeme que o dubide. Penso que estamos a asistir a outro paripé, neste caso creado polo seleccionador español, Jorge Vilda, que non soubo ou non quixo saber como xestionar a boa campaña xestada polo Deportivo Abanca no ano do seu debut na Primeira Iberdrola.
Jorge Vilda non soubo ou non quixo saber como xestionar a boa campaña xestada polo Deportivo Abanca no ano do seu debut na Primeira Iberdrola.
Nas últimas convocatorias do combinado nacional da pasada temporada o mundo do fútbol clamaba ante a ausencia na lista de xogadoras branquiazuis. Tere Abelleira, Peke, Sullastres, Nuria Rábano, María, Misa ou Athenea, entre outras, fixeran méritos máis que de sobra para obter ese premio. Vilda non o vía así.
Todo mudou tralo mercado de verán. Tere e Misa abandonan A Coruña para fichar polo Real Madrid, que chegaba oficialmente á competición. Vilda decide que, a pesar do parón polo Coronavirus e a ausencia de partidos nos que demostrar a súa valía, estas dúas xogadoras agora si que merecen vestir a camiseta da selección. E… sorpresa! Tamén ‘Peke’!
Algo comezaba a cheirar mal pero a boa nova e a ilusión da dianteira deportivista pola súa convocatoria para o encontro ante Moldavia clasificatorio para a Eurocopa 2020 disipaban eses nubarróns. A tormenta chegaría ao final dos 90 minutos, España derrotaba por 0-9 a Moldavia e, para sorpresa de todos, as tres debutantes non dispoñían de ningún minuto a pesar de parecer un contexto propicio para a súa estrea. Había que agardar.
O martes Vilda citaba a 23 futbolistas para enfrontarse á República Checa. Na lista están Misa e Tere pero non ‘Peke’. E eu pregúntome… Ocorreu algo tan relevante nestas dúas xornadas de liga para que as agora madridistas si merezan outra oportunidade e a deportivista non? Pode que segundo o club no que milites teñas máis opcións? E, se isto é así, pode que a primeira convocatoria fose un paripé e o seleccionador incluíse a Peke e as deixase ás tres sen minutos para non dar esa sensación?
Ocorreu algo tan relevante nestas dúas xornadas de liga para que as agora madridistas si merezan outra oportunidade e a deportivista non?
Son preguntas que quizás nunca teñan respostas pero, como en case todo, o tempo dará ou quitará razóns. Ogallá que Tere e Misa debuten e lles vaia moi ben porque o teñen máis que merecido. E ogallá que Peke non teña que eliminar as barras azuis da súa camiseta para merecer a atención do seleccionador.
