Din que nestes tempos hiperconectados abolíronse case todas as distancias. Podemos acompañar, falar, ver, rir… con quen están a quilómetros de cada un de nós e vivir momentos compartidos, aínda que só sexan virtuais.
Pero hai un sentimento, o de ser deportivista, que alimenta e conecta dunha forma única a quen o corazón nos latexa en branquiazul e vivimos fóra de Galicia. E aí non hai tecnoloxía nin dixitalización que vallan.
Nada é comparable ao directo. Ir aos estadios a animar ao teu equipo fai dos nosos sábados e domingos algo excepcional. E xa hai un par de tempadas que temos a fortuna de vibrar por partida dobre cada fin de semana, grazas ás xogadoras do Deportivo Abanca.
En tan pouco tempo, o Deportivo Abanca incrustouse na nosa paixón de forma xa definitiva. Polo seu empuxe, forza, ganas, fame de vitorias e orgullo de pertenza a un club centenario ao que, desde Cataluña, seguimos con alegría, sufrimento, impaciencia e orgullo a Pena Deportivista Barcelona e a Pena Miau.
Por todo iso, e moito máis, estamos seguros de que esta tempada tan complicada para elas será a da súa consolidación definitiva.
Nada é fácil, pero non estades soas.
Sodes as Nosas, pero nós somos vosos xa para sempre, e nas malas, moito máis.
______________________________________________________________________
Berta Guillín
Licenciada en Ciencias da Información pola Universidade de Santiago de Compostela. Traballou en diferentes medios e gabinetes de comunicación en Galicia. Hai anos que se trasladou a vivir a Barcelona onde agora exerce o xornalismo no departamento de comunicación da Asociación de Empresarios Galegos de Cataluña.
Coruñesa, deportivista, membro da Pena Deportivista Barcelona e dunha saga xornalística iniciada polo seu pai, Juan Guillín, e da que o seu sobriño, Juan é continuador.
